連詩雅着上熱褲，騷出 42吋長腿，仲嘟埋嘴錫鴨仔，但始終都係主角 Rubber Duck先最搶鏡。
FBI
合照解禁 群星影 Duck貼堂
全港市民捕足成個星期，象徵和平友愛嘅荷蘭巨鴨（ Rubber Duck），上週四（ 2日）終於「游」去海運碼頭同海港城同大家見面。單係上週六（ 4日），已吸引超過 30萬名市民，海陸圍攻追擊，一眾歌星及藝人亦熱烈潮拜，喺巨鴨正式現身維港前，已第一時間走去同巨鴨合照。
一班星之前因為主辦單位要求，喺上週四活動舉行前唔敢 po同鴨鴨合照上網，活動一舉行，即刻解禁爭 po。好似導演彭浩翔，先率領新片《飛虎出征》演員，包括杜汶澤同余文樂等一齊用水槍同巨鴨水戰；而歌星方面，連詩雅、官恩娜，仲有王菀之都爭住喺鴨前擺索爆甫士。
「腿神」 Shiga連詩雅着上熱褲騷出 42吋長腿，搶鏡到不「 duck」了。 Shiga同 FBI講：「好開心可以同隻巨鴨影合照宣揚和平，隻鴨好 cute，當佢游到出維港時，令我諗起細個同隻鴨一齊沖涼嘅情景。」不過佢就話影相當日唔記得帶「蚊怕水」，大腿俾蚊針咗幾啖。為了靚靚着短褲，唔怪「 duck」隻鴨喎！
狂拋鴨鴨
官恩娜同巨鴨影相時，一邊跳高，一邊拋出一堆小巨鴨，又要保持笑容，呢一連串動作，一啲都唔容易。
為鴨打氣
潮男周柏豪，不斷幫身邊隻吹氣鴨公仔泵氣，用另類方法為巨鴨打氣。
私伙鴨鴨
平時創意滿瀉嘅王菀之，專誠帶埋屋企嘅毛毛鴨公仔「渣鴨」去同一群膠鴨仔影相， 33歲 Ivana依然童心未泯。
飛虎射鴨
導演彭浩翔為宣傳暑假上映嘅新片《飛虎出征》，帶埋男主角余文樂同杜汶澤等，一齊揸住水槍去到巨鴨前射水開戰。
全城影 Duck
Rubber Duck自上週四（ 2日）正式「游」到海運碼頭後，巨鴨狂潮停不了，「追鴨潮」迫爆海運大廈、海港城甚至海運大廈停車場。《 FACE》喺 facebook粉絲專頁邀請讀者參加「你影 Duck FACE貼堂」活動後反應熱烈，收到大量讀者 email來相，可想而知巨鴨嘅吸引力有幾驚人。
留言列表
