cover face
Janice Man 買得起
人人都話， 80後男女，貪靚愛名牌，做事只顧眼前，做人沒方向；成年人似乎愛把自身怨氣發洩在年輕人身上。
身為一份子，我梗反對到底，同年代、三分親， Janice Man親身力挺，更以自己言行作反證。
買名牌、揸名車，可以保值啊！這也算是識諗吧！
目前，更拼命賺錢儲錢買磚頭，不為自己，也為家人，就算要對住死屍演戲，照做。
購物如做人，目標明確，哪怕別人總盯着其私生活不放，自己事業，自己負責，誰再敢說 80後半句壞話？
事業上，雖未有爆破點，但我相信，她可以厚積薄發，到時候，想買乜都得啦！
Profile
文詠珊
出生日期： 1988年 12月 29日（山羊座）
出生地：香港
學歷：中五畢業
身高： 5呎 3吋
體重： 98磅
語言：廣東話、英語及普通話。
簡歷： 14歲，兼職模特兒。 3年後，夥拍 Angelababy以孖妹形象拍廣告走紅。
09年，簽約黎明旗下 A Music，現主力拍電影。
主要作品：《為你鍾情》（ 10），《報應》、《 Laughing Gor之潛罪犯》（ 11），《大追捕》、《熱愛島》（ 12）。
微博： http://weibo.com/janiceman 
我好理性
14歲做𡃁模， Janice坦言自己天生貪靚，享受做焦點，今日，有名氣，賺到錢，更用心打扮得靚上加靚。
準時到達，一入門口，我見到她那個新鮮出爐的螢光粉紅色 Boy Chanel手袋，燦眼到呢！
「我係品牌小粉絲，中學一畢業就用自己做 model賺的錢，買了人生第一個 Chanel 2.55，當時來講，真係好大一筆投資！」
為證愛無涯，由手袋、銀包、平底鞋，無不掛着香奈兒嘜頭，我毫無疑問認為她誓死效忠「 double C」，誰不知，轉個頭又見雜誌刊登伊人挽住愛馬仕 Birkin，會否成熟咗啲呢？「唔係好成熟啫！我覺得好靚。
「揀焦糖色配金色釦，易襯，款式長青，可保值！
「第一個 Birkin是託朋友去巴黎買，大概一層樓首期的十幾份之一，我考慮好耐至買！」
年紀輕輕已名牌滿身，難怪妹妹仔、中女甚至阿太，大部份雌性動物都羨慕埋一份啦！
「喜歡大袋，有安全感。」
手袋之外，還有衣衫鞋履以至座駕也需投資，開支豈非很大？「穿衣盡量簡單，來去幾套，袋及鞋最捨得。」
講得輕鬆，我倒覺得，賺錢容易，物質佔據，好易失控，但 Janice購物哲學：一係唔買，一買就要值回票價。「我唔鍾意 shopping減壓，購物好理性。
「我每買一樣東西，都有認真想過度過，唔想只用得幾次，盞浪費，用完又會好好收藏。」
現在，家中超過一百對鞋置於鞋帽間，「自細希望有鞋帽間，依家總算得償所願！」
唔會想太多
購物時， Janice一副左度右度小女人姿態，講到做人，外表柔弱的她，處事爽快，分分鐘比你我更硬淨。
「自細性格好男仔，鍾意話事，連細佬升學就業都要先問過我，從來不需要別人特別照顧。」拍攝時，她也一副主人家姿態，哪一套衫襯哪一種顏色唇膏，效果如何，甫士如何，通通自主，助手也唔敢過問。
獨立、自主，好有大家姐風範。
「依家我唔可以坐公共交通工具，又沒司機，自己揸車代步，更多時候載住屋企人周圍去，唔麻煩啊！我好鍾意揸車，心情唔好，一個人四出兜風，有一種好獨立感覺。」
獨立唔係得個講字，大半年前，去雲南拍一齣恐怖懸疑電影，這段日子，充份表現出其大無畏精神。
「故事講我係遺體化妝師，拍攝時，一半時間留在殯儀館停屍間，日日對住屍體。
「頭一兩日，當我一個人在酒店房休息，有啲驚，但之後日日早出晚歸，又要背劇本，累到透支，根本沒時間想太多，一上床，馬上睡着！」娓娓道來，仿如別人經歷，俾着其他女人，可能已驚到呱呱叫。
近兩年，個人作品不算多，香港講求人氣，少曝光，多蝕底，未來日子， Janice又有甚麼新計劃？
「下個月拍內地電影，目前，主要拍廣告、影雜誌、出 event。
「我唔會想太多，寧願好好享受每項工作，目標明確，心情輕鬆得多；「這是山羊座的最大優點。」
沒適合人選
對於事事講求實際的山羊座，工作以外，下一個目標，會是結婚嗎？
Janice乾笑兩聲，「雖然好多朋友結咗婚，自己未諗，根本未出現一個人，令我有結婚衝動。
「對於沒把握的事，我唔會多想。」
從前認識她，總是喋喋不休談個不亦樂乎，現在，嘴巴收歛了，我覺得有點沉重，「細個時，成日講感情，會 plan 28歲結婚， 30歲生 BB諸如此類；「人大了，想法會變，身邊還沒有適合人選，點結婚啫？！」後生細女沒男友呵護，等於壯士斷臂，好淒涼噃！「睇人拍拖、戥人開心囉！」
來自美滿家庭的她，對婚姻一直充滿憧憬，刻下，事業固然重要，除此之外， 25歲了，渴望有個家嗎？「我好想！
「但生 BB真係未諗過，我估對方一定要同我好夾，一凹一凸，完全理解我，兼且包容我藝人身份，至能成事；「我的身份，某程度上會令大家失去私隱。」
前男友為圈外人，未來日子，會否認識圈內人拍拖？「相互了解，同行與否，唔重要。」
拍拖處於被動位置，拍戲亦然，那麼，實際的她，有想過新部署嗎？
「開餐廳、開時裝店，我鍾意煮嘢食，又鍾意扮靚，任何一個範疇都可以吧！
「賣衫的話，親自飛去外國入貨，店內兼售二手衫，本身好多衫著過一次之嘛！嚴格來講，只著過幾粒鐘，好浪費。
「又或者，開蛋糕店、按摩店……你睇，我計劃多多，點會靜下來？」
煞食外表，滿腹大計，何憂嫁呢？
後記
回想起，半年前的 Janice仍大談買樓經，重提舊事，她嫣然一笑，「邊有咁易？
「我一直密切跟進樓市，依家唔係入市時機。」
我笑她，一派專業投資口吻。
「其實，中學畢業起，屋企一直幫我購買投資產品，都有回報，但股票真係唔再買，之前，個半月拍戲，根本冇時間睇住，結果坐艇，好慘痛。」
投資小挫，令她用錢更謹慎，做人如投資，穩中求勝，真係好山羊座性格。
Shop List
CHANEL中環太子大廈 G18號鋪 2810 0978
CHANEL BEAUTÉ銅鑼灣希慎廣場 106-107號鋪 2810 1083
I.T銅鑼灣希慎道 1號 2890 7012
Lane Crawford中環國際金融中心 3樓 2118 7683
Loewe中環置地廣場 B29-30號鋪 2522 0996
Michael Kors尖沙咀半島酒店地下 W2號鋪 2366 2301
撰文： Nicola Lai
形象：黃健華
攝影：郭賢興
化妝： Do Do Au Yeung
髮型： Zap Tang@Xenter
鳴謝： CHANEL BEAUTÉ
留言列表
