Beauty Hunt
影帝教路 新念慈菴妹張敏潔
影帝劉青雲最近頻頻拍廣告，最新的「京都念慈菴積熱清」電視廣告中，有一位清純女主角，是新晉模特兒 Kit（張敏潔），首次拍廣告便可以扮咀青雲，好鬼幸福！
Kit入行一年多，已攞過兩次 model大賽冠軍，最近珠寶界舉辦的珠寶小姐選舉，她亦已打入 10強準備迎戰決賽。雖然是冠軍級人馬，但她卻冇興趣選港姐，要俾班師奶評頭品足，未必個個頂得順嘅！
Kit去年參選銅鑼灣地帶模特兒比賽奪得冠軍，簽約成為 Primo旗下模特兒， 22歲女，今年更與劉青雲在廣告中演情侶， Kit話事前已好緊張，幸好正式拍攝時，青雲主動幫她入戲。 Kit說：「青雲好 nice㗎！記得第一個鏡頭係佢攞走我塊薯片，本來佢冇對白嘅，但可能見我緊張，佢就開口：『咁熱氣仲食薯片？』然後搶走塊薯片，真係好好囉，可以帶我入個感覺度，令我表情同眼神都交到反應。」
另一場戲講 Kit要瞌埋眼𠌥身扮錫青雲：「我同佢講如果我𠌥前得滯，你記得向後番少少，跟住佢話：『我唔會做啲咁衰嘅嘢嘅！』同我講笑囉，真係好 nice㗎！」
Kit話一直好欣賞劉青雲，仲講得出影帝有幾勁：「佢喺《神探》同《消失的子彈》都係代入受害人嘅角色去思考，而佢又可以演繹得好唔同，所以好鍾意佢！」
Kit（左）與傅嘉莉（右）同屬 Primo公司 model，上週三（ 13日）一齊出席蘭桂坊活動，但 Kit未想好似師姐咁入電視台工作。
張敏潔（ Kit） Profile
年齡： 22
身高： 166cm
fb專頁： Kit Cheung張敏潔（粉絲人數 2,622人）
微博：張敏潔 Kit（粉絲人數 53人）
Instagram： kitcheunginstagram（粉絲人數 152人）
選港姐 no way
Kit說起劉青雲時有點怕醜，但說到自己參加珠寶小姐選美則信心十足：「之前喺化妝品公司做暑期工，參加咗個品牌選美，攞咗最上鏡小姐、網上投票同埋總冠軍，上年選銅鑼灣地帶 model比賽都攞咗冠軍！我參加係想攞多啲做 model嘅經驗，將來發展有幫助。」
珠寶小姐是她參選以來最大型的比賽，自然有壓力，她說：「事前休息多啲，做多啲 facial、跑步做運動減壓囉。」問到她會否選港姐，她卻耍手擰頭：「覺得自己未去到嗰個階段，相信壓力會好大囉，始終𠵱家好享受自己嘅生活，唔想冇晒自由，同埋我鍾意做模特兒多啲！」唔想入大染缸，真係幾難得！
今屆香港珠寶小姐將於本月 28日誕生， Kit（小圖）說能入選 10強已感到有壓力，能否三連冠就要靠大家上網投票咁話。 
兩年前 Kit參加銅鑼灣地帶選美比賽奪得冠軍，當時她只是 freelance模特兒，一副𡃁妹格。 
採訪、撰文：何志衡
攝影：范仲良
化妝、髮型： Kathy Mak
形象： Bryan@the Flaming
服裝： snidel
留言列表
