CLOSE-UP

高清風

上個禮拜 Samsung機王 GALAXY S4開售，計埋之前公布嗰幾部高清屏幕手機，正式揭起手機世代交接序幕。
講到尾，高清手機而家唔算多，係時候入貨未？應該揀邊部？今期話過你知。

好多人揀手機都會好似 Abraham咁，先睇外形，再睇速度同相機像素，好少會留意屏幕有冇高清，「之前用開 Sony Xperia S，好少用嚟睇片同打機，都愈用愈慢。今年三月見 Sony有新機出，有四核心同 2GB RAM，速度同其他品牌頂級機差唔多，就扑槌買囉，根本唔知個屏幕有高清。」
點知一開機，即刻俾屏幕質素吸引，「開機試影咗幾張相，翻睇嗰陣發現色彩好突出好細緻，奇怪點解同以前差咁遠，睇番說明書，至知原來個芒解像度係 1920× 1080p，同屋企部電視一樣。」
發現新大陸後， Abraham開始瘋狂試片同打機，想辦法用盡個靚芒，「既然官方講到個芒咁靚，就想挑戰吓極限，所以就不停搵高清片同高清 apps試機。同以前嘅最大分別，係用舊手機上網串流睇球賽，畫面差到離譜， wide shot只睇到球員一笪笪，睇到冇心機睇。而家用高清芒，畫面同部 17吋電腦芒有得揮。」 Abraham笑住話已經中晒手機毒，打機睇片樣樣齊，一日玩足七個鐘，「而家除咗開工，時時刻刻都會拎部手機出嚟玩，近排仲迷上玩《 Candy Crush》，每日都要玩番兩三個鐘。誇張啲講，見個芒咁靚，就算過唔到版都開心。」

誤中高清毒

Abraham
42歲　投資銀行董事
因舊手機愈行愈慢，換機時誤打誤撞投入高清手機懷抱，點知一試上癮，變咗典型低頭族。

街頭試玩

男士用高清芒睇呢條水著片，好多都睇到眼金金，猛讚色靚，身材正。 

究竟高清芒係咪真係咁大分別？今期我哋帶咗部 new HTC One落區，俾街坊試睇預先下載嘅兩段 1080p同 720p短片，男嘅就睇日本水著女優 MV，女嘅就睇近日推到上報嘅加士居道紅衣女鬼車 cam片，發現好多人睇完都猛讚高清芒正到極。

癡等 iPhone
Sanna
19歲　全職模特兒
「平時用 iPhone影相拍片，用手機睇已覺得好正，但估唔到而家 Android手機仲清仲靚，尤其色彩仲好均勻，真係要俾 Like，不過用慣 iOS系統，希望下一代 iPhone都有啦。」新 iPhone最快都要六月先公布，睇嚟 Sanna有排等。

讚到似打手
Mr. White
20歲　大學生
「 Resolution好高，色清畫面又順，好正喎！好似條片咁，高清下即使 model背晒光，個樣唔會黑孖孖，皮膚細紋都見到晒，真係好想買。不過而家部 S3玩唔夠一年，唔會咁快換新機住。」好彩臨尾冇話要即刻買，唔係個答案咁標準，真係似打手呀。

嘩嘩聲
Pansy（左）
25歲　售貨員
Vivian（右）
27歲　售貨員
真心講，問咗咁多人，雖然個個都有讚，但都唔夠 Pansy同 Vivian咁大反應，尤其係 Pansy，睇片睇到嘩嘩聲，「低清版睇完超驚，以為真係有鬼，睇完高清先知原來唔係鬼嚟。」 Vivian喺側邊猛點頭同意，「之前用過 iPhone 5喺 YouTube睇過段片，睇到一半已經勁驚，但睇完高清版，真係唓咗一聲。」

睇得好舒服
Winnie
22歲　大學生
「先此聲明，我鍾意用 iPhone，所以一直認定畫質唔會有好大差別。但睇完試片，真係冇得唔認，高清芒睇片靚好多，就算畫面背景好暗，都仲睇到有乜。」粉絲都俾 Like，蘋果睇嚟都係時候要發力。

專家話　寄望片源

路人甲乙丙丁全部話睇到高清同低清有幾大分別，但估唔到影音專家李柏權，就反高潮話未成熟，「手機高清芒有 1080p顯示，理論上會靚好多，但其實手機屏幕細，睇起上嚟同 720p唔係差得咁遠。最重要係而家 1080p影片檔案偏大，兩分鐘已經要 180MB左右，加上手機內存唔夠大，好難儲存幾套高清片，如果日後研發出更好嘅影片壓縮技術，流動高清先算成熟。」

新機互片

Samsung、 Sony、 LG同 HTC先後推出 1080p高清屏幕配四核心處理器嘅 Android smartphone，應該揀邊部？今次就由「電量」、「效能」、「屏幕」同埋「影相」質素，四方面詳盡測試，買機前必睇。

鬥長氣

好多人以為手機電池容量愈高就愈長氣，理論上冇錯，但實際上好受手機零件（尤其係屏幕）或系統影響。今次將《少年 Pi奇幻漂流》嘅 1080p全高清電影（片長約 127分鐘）放入四部手機，然後將屏幕調校至七成光度、 headphones七成音量兼用 BSPlayer app播放，睇吓播一次要用幾多電，同埋可以連續播幾耐。

S4夠長氣，就算狂煲劇、上網，都夠用一日。 

結果

原本以為配備 3000mAh電量嘅 LG OPTIMUS G Pro會贏，但最終係 GALAXY S4跑出，播完三次都仲有一成多啲電量，正常用部機，充滿一次電應該夠頂一日。唔可以換電嘅 Xperia Z同 new HTC One嘅成績就弱啲，兩部機都只可以連續播四個鐘，如果成日上網或睇片，應該要帶外置電先夠用。

用得爽

硬件方面，四部手機都係四核心處理器加 2GB RAM，同時間開幾個 apps都應該好爽。試用專業評測手機 app《安兔兔評測》逐部機跑分（愈高分效能愈高），之後再開齊四個 apps： Play Store、瀏覽器、 BSPlayer以及《 Frontline Commando: D-DAY》遊戲，再用《 Memory Booster》 app睇吓剩番幾多 RAM（數字愈大，代表同時間開多幾個 apps都會好暢順）。

話就話 S4有 16GB儲存空間，但系統用咗差唔多四成容量，只剩番 9.15GB俾用家。同樣 16GB嘅 Xperia Z就仲有 11.73GB，相差成 2.6GB，認真離譜。 

結果

雖然睇安兔兔評測， S4分數比其他三機高，但用落感覺其實差唔多，全部都用得幾爽。由於 GALAXY S4系統佔用太多 RAM資源，所以開咗四個 apps之後，只得番 184MB可以用，再開多啲 apps就未必應付到，嚴重跑輸對手。呢個回合就由 new HTC One贏番一局。

屏幕質素

全高清質素同細緻度都睇到路人嘩嘩聲，不過雖然同係高清芒，四部機都有好大分別，試睇《少年 Pi奇幻漂流》高清電影其中兩幕（均以最高光度播放），贏輸好明顯。

顏色

測試位：少年 Pi喺市集匿喺色彩繽紛嘅花擺設後面，偷望心儀女神。

Samsung GALAXY S4顏色鮮艷得過分，味精濃。體積/重量： 140.1/ 71.8/ 7.9mm/ 130g 

Sony Xperia Z顏色雖然都算自然，但屏幕明顯偏光，有啲刺眼。體積/重量： 139/ 71/ 7.9mm/ 146g 

LG OPTIMUS G Pro屏幕偏暗，睇落唔夠色，暗位 details死晒。體積/重量： 150.2/ 76.1/ 9.4mm/ 160g 

勝： new HTC One色彩自然，光暗亦最適中，睇得舒服。體積/重量： 137.4/ 68.2/ 9.3mm/ 143g 

結果

論屏幕整體質素， new HTC One的確最自然同埋最好睇。 S4都算唔錯，略嫌顏色太濃烈，好似加重味精一樣。 LG同埋 Sony就一個太暗一個太光。

細緻度

測試位：細路仔時期嘅 Pi第一次同老虎眼神接觸。

Samsung GALAXY S4畫面銳利，細緻到每條老虎鬚同毛都睇得清楚。 

Sony Xperia Z估唔到表現出色，細緻度高，而且顏色及光度都好適中。 

LG OPTIMUS G Pro雖然細緻度都算高，睇得清老虎鬚，可惜屏幕太黑，黑位冇晒層次。 

勝： new HTC One表現同 S4差唔多，只係屏幕略細。 

相機比併

除咗用嚟上網、打機、睇戲同聽歌，影相亦係常用功能。今次就以兩個最常遇到嘅情景，全部以自動模式試拍，睇吓邊部影得靚。除咗以上兩個測試之外，去 NEXT 3.0網頁版仲可以睇到前鏡自拍以及微距影花嘅測試相。

人像拍攝

勝： Samsung GALAXY S4有少少偏紅，影像四機中最 sharp，面上細紋都睇到。 

Sony Xperia Z雖然顏色同 new HTC One同樣自然，但輸在唔夠細膩。 

LG OPTIMUS G Pro影像銳利度同顏色都好 sharp，不過有少少偏紅。 

勝： new HTC One鏡頭最 wide，顏色又夠自然，影像雖唔及 S4細膩，但都非常出色。 

美食分享

勝： Samsung GALAXY S4影像銳利，蛋糕上嘅朱古力粉都睇得好清楚。 

Sony Xperia Z雖然偏紅但感覺較鮮艷，望落好似好好食。 

LG OPTIMUS G Pro室內光度唔夠時，影像雜訊明顯增加，細緻度大減。 

new HTC One雖然影像同樣銳利，不過有啲青，食慾稍減。 

前鏡自拍

LG：唔夠光，影像顏色偏青。 

S4：影像過度曝光，冇咗啲 details位。 

HTC：顏色偏紅，但都保留到細緻位，而且望落都順眼。 

Z：顏色最自然，不過影像唔夠細膩。 

微距影花

LG：對比度不足，好似隔咗層霧。 

S4：過分偏紅，但細緻度最出色。 

HTC：顏色最自然，不過放大張相嚟睇，影像唔夠細緻。 

Z：同 S4一樣過分偏紅，但幾乎冇雜訊。 

結果

論拍攝功能， S4同 new HTC One都比較出色，只係略嫌 S4有點偏色，同埋 new HTC One細緻度又輸番少少。至於 Xperia Z同 LG，影出嚟樣樣都差少少……輸得心服口服。

附加功能

除一般拍攝功能之外，手機都加咗啲好玩功能入去，為手機嘅相機功能增值。

刪除雜景

對應機種： Samsung GALAXY S4、 new HTC One
影相嗰陣突然有路人甲入鏡，認真大殺風景。 S4同埋 new HTC One都內置刪除背景物件功能（ S4要進入「橡皮刷」模式後先用得、 new HTC One就可以先連拍多張相後，於編輯時選「物件移除」來刪去多餘背景），原理係連拍幾張相做比對，然後再將移動中嘅物件刪除。

new HTC One執相前 

執相後 

雙鏡拍攝

S4內置八款前鏡頭相框特效 

對應機種： Samsung GALAXY S4、 LG OPTIMUS G Pro
前後相機同時拍攝，以後影團體合照，就唔怕冇咗揸機人啦。

總結

雖然 new HTC One同 GALAXY S4嘅評分一樣，但係如果想搵部效能平均嘅手機，首選都係 new HTC One；想要部夠長氣、屏幕又夠大嘅，就最好揀 GALAXY S4。

facebook

只要在 Facebook以「 NEXT 3.0」為關鍵詞搜尋，或以手機的「 QR code」 app掃描，就可以睇到更多新聞同產品情報。

玩盡影音

買得高清手機，梗係要用盡佢先對得住自己， download下面呢啲免費 apps，唔單只可以發揮靚畫面，仲可以幫手谷靚聲同埋慳電。

隨時追劇

要睇高清片，記得要喺左下角圖案揀「 HP源」（紅圈）。 

PPS影音
好多人都習慣串流睇片，除咗 YouTube有高清片睇，《 PPS影音》入面都有唔少韓劇同日劇有高清質素，足以用盡高清屏幕嘅顯示能力，拍埋其他普通手機，贏晒！

靚車靚景

以為同其他車 game一樣，可以亂衝亂撞搶頭位？原來撞完之後要維修，逐樣同你計錢，都幾襟計。 

Real Racing 3
暫時得好少 game支援 1080p， EA推出嘅《 Real Racing 3》係其中一隻。遊戲入面車身嘅反光位、光暗位都做得好真好靚，感覺同用 PS3玩冇分別。

播歌最強

主畫面有簡單版均衡器（ EQ）調校，想搵專業版，可以入設定畫面慢慢 set。 

Neutron Music Player（ Eval）
鍾意聽歌又追求靚聲，點會用內置音樂播放器？《 Neutron Music Player（ Eval）》被網友捧為 Android手機最好嘅音樂播放器，音質唔錯之餘，仲支援 WAV同 FLAC兩種無損音樂格式，愛歌之人點少得。

執相必備

用手指上下同左右捽就執到相，唔怕設定框遮住，手機 app嚟講真係好用。 

Snapseed
屏幕質素提高，睇相都容易睇到不足之處，嫌《 Adobe Photoshop Express》太複雜，可以揀功能簡單啲同可以用手勢調校嘅《 Snapseed》，揀咗相之後，可以用手指上下捽屏幕揀白平衡、光暗等唔同設定，左右捽就揀埋強度，執相話咁易。

點都要慳

預設模式中，最有用應該係 Ultimate Saving Mode（黃框），開咗之後淨係收到電話同短訊，玩到部機得番一格電，可以靠佢吊命。 

Battery Booster
高清手機屏幕耗電如倒水，最好裝番個慳電 app，《 Battery Booster》預設四種省電模式，亦可因應個人習慣自行設定，啟動後會自動關閉背景 app，慳到更多電。另外，亦可以記錄低最近三日電量消耗情況，更清楚點用最食電。

直播高清

Freemake Video Converter
想將 Blu-ray轉做 1080p格式影片放入手機睇，最好用《 Freemake Video Converter》電腦軟件。介面簡單易用，仲有「處理完成後關閉 PC」選項，臨瞓之前轉片，都唔使部電腦開到天光。一般用四核心處理器嘅電腦，部戲幾長就轉幾耐，輸出檔案最細都 6GB以上。由於記憶卡有格式限制，大過 4GB嘅單一檔案係抄唔到入記憶卡，所以最好直接抄入手機嘅內置記憶體。
檔案大小： 1.2MB
下載網址： https://www.freemake.com 

轉出靚聲

Exact Audio Copy
追求音質，就唔可以再停留喺 MP3質素，最好將 CD轉成 FLAC無損壓縮格式，先至可以原汁原味聽到 CD品質。電腦軟件方面，首選《 Exact Audio Copy》，除咗因為免費，最重要係可以直出 FLAC，一首三分幾鐘嘅歌大約 25MB左右，轉完直接抄入手機就聽得。
檔案大小： 4.2M
下載網址： https://www.exactaudiocopy.de 

最高規格

手機芒追上 1080p，其他 gadgets，就開始走得更遠，好似今年電視機都走入 4K領域， 720p變成歷史，可以放入博物館。

電視

Sony嘅 4K電視今年七月開賣，可以倍線至 4K播放嘅 Blu-ray機連 5.1喇叭就賣$9,980。 

Sony同 Samsung上個月前後腳出 4K LED TV，解像度達 3840× 2160， size最大去到 85吋，而且講到明電視台未來決定用邊隻 4K標準，都可以靠更新電視嘅 firmware收睇。暫時未有最大吋數型號嘅行貨定價，外國報導話估計 Sony部 84吋開價 US$25,000（約 HK$195,000），好貴！好在 55吋型號賣 US$4,999（約 HK$39,600），叫做合理少少。

攝錄機

荷李活唔少大片都轉咗用 4K攝錄機拍，例如導演 Joseph Kosinski就用 Sony部 4K機 CineAlta F65拍《攻•元 2077》。 

早喺 07年， RED已推出可拍攝 4K影片嘅 ONE， Canon進一步平民化，新機 EOS C500嘅 size貼近 DSLR，導演陳果都話會用嚟拍新戲《那夜凌晨，我坐上了旺角開往大埔的紅 VAN》。當然講細冇人夠 GoPro Hero 3撼，不過所謂嘅 4K片每秒只影得十二格，似連拍相多啲。

LCD芒

上年 EIZO推出 36.4吋 4K芒，標價廿七萬，貴到嘔！ 

電視賣得貴，電腦芒亦不遑多讓，目前有 EIZO、 Sharp、 ViewSonic等幾個牌子有出 4K芒，但係平極都要四萬蚊，而且 4K電腦 game來來去去得《 Battlefield 3》、《 Crysis 3》幾隻，相信有排先普及到。

手提電腦

用 Chromebook Pixel睇相，靚得好緊要，可惜香港暫時未有行貨。 

自從 Apple將 Retina Display引入 MacBook， notebook芒即刻變高清，不過今年 Google宣布推出 Chromebook Pixel之後，將解像度再推高一層，去到每吋芒有 239點像素（ MacBook每吋 220點像素），睇相睇片效果超靚。

音響

裝咗 Atmos系統嘅戲院，天花板會有多兩排喇叭。 

影像發展快，聲音一樣配合到高清世界，屋企勁極最多得 11.1聲道，但係戲院可以用 Dolby新標準 Atmos，有成 64聲道，除咗前後左右四邊喇叭，仲特別加多兩排上方音場喇叭，聲音終於可以連續唔斷飛過頭殼頂，臨場感爆燈。

相機

Nikon專登搵攝影師，用 D800喺法國國家圖書館影高清相，放大睇，細緻到連書嘅封面圖案都睇到。 

即使 DC嘅「像素競賽」近年慢咗落嚟，但係新機像素閒閒哋過千萬，好似舊年推出嘅 Nikon D800，像素高達三千六百萬，仲未計像素更高嘅中幅機同埋 digital back，咁多樣 gadgets當中，相機必定係最高清嘅成員。

超高清玩法

以為 4K已經夠勁，查實外國電視台開始研究緊 8K廣播，玩影相，像素亦升級到億億聲，未來絕對係「超高清」世界。

8K攝錄機由 Hitachi幫手研發 

NHK專登搵 Sharp整咗部 85吋 8K電視做 demo，現場示範 8K有幾誇。 

進軍 8K

上個月喺美國搞嘅 NAB廣播展，日本 NHK電視台現場示範咗自家研發嘅 8K攝錄機，可以拍到 7680× 4320解像度，每秒最多可以拍到 120格，同埋可以處理 22.2聲道。現場有 show off部機上年喺倫敦奧運拍過嘅片，不過有排都未有 8K電視入屋，唔知下屆奧運有未？

千億像素

DC嘅感光元件頂多得幾千萬像素，如果想解像度再高啲，唯有拎部 DC係咁影，再將所有影像合而為一。最近倫敦出咗超高清相，就係用呢個方法，擺四部 Canon EOS 7D喺電視塔頂， 360度影晒全倫敦市，再將影到嘅近五萬張相組合成 3200億像素嘅全景相，打破紀錄，成為目前全球最高像素嘅數碼相。

慢慢 zoom in睇張相，三十公里外嘅途人一樣清楚見到。 


text、 photo：科技組
graphic：祝健中