扮 Mark哥宋承憲在電影《無敵者》(韓版《英雄本色》)飾演 Mark哥,佢叉住嘴角呢個輕佻神情,完全捉到發哥神髓。 

亞熱帶

靚偈王 宋承憲

多年來做慣靚仔,宋承憲步入中年,居然返璞歸真,先在韓版《英雄本色》做 Mark哥,近日再於韓劇《當男人戀愛時》做黑幫大佬,實行爛撻撻賣野性 feel。不過,斯文靚仔又好,社團大哥都好,想女 fans睇就一定要騷自己副「靚偈」,宋承憲識得不時在微博及劇集中發功,計算準確。

 


又幾似喎!(設計對白) 

近年韓國、大陸都興「穿越劇」,宋承憲食住個勢,去年接拍《仁醫》飾演一名回到古代的名醫,本來諗住掂梗,點知到結局都只有 8.8%收視。相比同期由張東健主演的《紳士的品格》高收 23.5%,收視輸成條街。不過宋承憲輸人唔輸陣,被問到收視欠佳時,仲暗寸張東健老過自己五年:「拍《仁醫》時撞正電視台罷工,搞到製作倉卒咗,台前幕後已經盡晒力,收視唔好都係天意。張東健係前輩,輸俾佢都好應該吖!」

 

今年再拍《當男人戀愛時》,宋承憲自然不容有失。為了 keep住最好身形,前排去到新加坡宣傳的宋承憲,就忍口唔食至愛的辣椒蟹,寧願留喺酒店食白烚雞肉,把握時間健身。不過佢亦好坦白:「我都係拍劇至臨急抱佛腳 keep fit,因為我覺得人有少少肥肉至正常,成日操得太 fit反而唔健康。」好在《當》近排都有 11%收視(約 550萬觀眾),成績算是不錯。

黑幫追女

在《當男人戀愛時》,宋承憲飾演一名進軍文化界嘅黑幫大佬,申世京則是玉潔冰清的窮學生。宋承憲想追申世京,不過手段同心態都係宅男級,溝女王宋承憲演得辛苦。


三男鬥 chok

去年諧星鄭俊河(中)在 twitter公開與權相佑(左)及宋承憲(右)的 chok相,估唔到三個大男人都咁玩得。

死撐仁醫

宋承憲去年在《仁醫》飾演回到古代的名醫,戀上貴族朴敏英,可惜俊男美女的配搭慘遭滑鐵盧,憲哥仲死撐話想拍續集。

放生新拍檔


宋承憲及松嶋菜菜子在日版《人鬼情未了》做夫妻,兩人重演搓陶瓷一幕。 

以往每拍一套劇,宋承憲都會多一個女朋友,好似崔智友(《訊息》)、宋慧喬(《藍色生死戀》)、孫藝珍(《夏日香氣》)、金泰希(《我的公主》)都走唔出憲哥手指罅。在《當男人戀愛時》, 36歲宋承憲的拍檔,是細過他 14年的申世京。
申世京是韓國近年上位新女,童星時代已經演出過大製作《善德女王》,去年又同 Rain在電影《壯志衝天》做一對歡喜寃家。不過可能因為太幼齒,加上唔係憲哥揀開好身材一類,佢同憲哥罕有冇緋聞。俗語有話:「喺嗰度食,唔好喺嗰度屙!」宋承憲終於都聽得明!

互𥄫波地

宋承憲同金泰希在《我的公主》飾演一對歡喜寃家。劇中宋承憲被金泰希睇蝕晒,不過出席活動時,就輪到憲哥喪𥄫希妹。


食得肥膩

元斌、宋承憲及宋慧喬主演的《藍色生死戀》帶動韓流,憲哥仲撻着宋慧喬。不過,當年宋慧喬個樣扒味濃郁,憲哥都幾重口味。

微博給力

近年金喜善、李多海、金賢重等韓星都開微博冧內地 fans,身為前輩的宋承憲都唔例外,不但 post相勤力,仲譯晒做中英韓文,任君對照。


宋承憲唔止有腹肌,仲練到連「人魚線」(即男人腹肌下兩側的肌肉呈「 V」形)都有埋,即是練到皮下脂肪比例不足 10%,難怪要騷一騷。 

在白色情人節,宋承憲手握黐上自己名字的心形波板糖,向中國女 fans示愛,肉麻得來,又幾 sweet! 

前年宋承憲在韓國開 pizza店,不單趁機會展示廚藝,仲自稱「當男人下廚時」, sell自己套新劇。

撰文:阮英維

arrow
arrow
    全站熱搜

    tvb4life 發表在 痞客邦 留言(0) 人氣()