習慣了席地而坐的宋芝齡，在客廳以茶几和咕𠱸代替梳化，感覺舒適。單位有廿五年樓齡，舊樓樓底高，裝上射燈感覺開揚，「最重要係屋企細唔可以用吊燈，所以簡約為主，射燈最好，方便易打理。」
星悅居
古典韓舍 宋芝齡
香港地樓價貴，富豪先有資格住大宅，不過若然肯花心思及少少錢，一樣可以擁有自己的「豪」宅。
擁有韓國血統，在《都市閒情》節目任主持的宋芝齡，擁有一個八百呎銅鑼灣寓所，自覺住得悶兼陳設殘舊，前年大手筆花 100萬將全屋豪裝，舊樓當新樓住。裝修後，客廳與房間保持韓風。但最花錢的卻是廚房與浴室，走 cyber路線，樣樣用頂級廚、廁具，可媲美高級餐廳。芝齡傻笑道：「我啲朋友成日話我傻，咁大筆錢可以買到層樓喇！」傻又何妨，最緊要住得開心。
宋芝齡與男友 David拍拖 3年，早前兩口子合資開韓式小食店，年底兩人將拉埋天窗，最開心是宋媽媽。 
韓國人睡房當然走韓國路線，不能走寶的是這個古舊的飾櫃，「呢個係古時韓國啲有錢人屋企先可以擁有嘅櫃，係我阿姨送俾我㗎，專程叫人運返嚟。」 
在宋芝齡的睡房中，寢室用具牀單被褥一併由韓國運到，韓式牀鋪甚有大長今 feel。
韓國空運傢俬
宋芝齡裝飾後的「新居」，簡潔明亮，沒多餘「垃圾」。身為中韓混血兒的她，睡房與客廳堅持走韓風，睇電視、食飯也是席地而坐，慳位又闊落。「喺韓國長大，都係覺得坐地下舒服啲，我男友個單位有梳化，我反而覺得唔自在。地氈、咕𠱸、茶几等大部分傢俬，我堅持喺韓國運返嚟，因為媽咪鍾意，佢覺得正宗啲！」芝齡說。
芝齡近年已少有幕前演出，只有在午間的《都市閒情》才出現，保持些少曝光率，「我要開拓我嘅生意，希望轉型做個成功嘅商人，哈哈哈……」笑起來雙眼瞇成一線的芝齡，除了搞食店外，另與友人在同區分別開設韓語學校及婚紗攝影公司，諗頭多多，所以其書架上亦放有很多不同類型書籍，如韓語字典、營商哲理等，自我增值。「我都唔後生喇，趁仲有能力就試吓其他嘢，依家仲係學習階段。」
宋媽媽專程由韓國帶來的一對木雕鴨原來有名堂，「呢對鴨韓國好興，寓意祝福，好多家庭都會擺。媽咪想我快啲結婚，所以就擺一對喺屋企。」芝齡甜笑說。 
近期因與友人合資開婚紗攝影公司，令宋芝齡突然迷上攝影。「唔識㗎，買部機返嚟自己摸索吓，學習吓囉！」 
雖然懂流利韓語，但芝齡仍不時買韓語書 keep住唔好俾自己生疏；聽歌方面她則鍾情英文歌，上至麥當娜下至 Beyonce都啱。 
在客廳兼有小型工作廳，方便在家接食店外賣電話。書枱及書櫃都是以黑色為主，配合白色牆身。
豪華廚廁
記者欣賞完舒適的韓式客廳與睡房，參觀廚、廁又是另一大享受，皆因全屋裝修費的七成（約 70萬）就是落在這兩個地方。
廚房走 cyber路線，型格與高貴集於一身，雖不很寬敞，但所用的廚櫃系列全是高檔貨，煮個辛辣麵也像置身高級餐廳一樣。「我好少煮嘢食，媽咪先係大廚，但我覺得廚房係一間屋幾重要嘅一 part，細係細啲，咪整番靚靚哋，感覺都舒服啲，如果廚房污糟就好大鑊。」
至於洗手間也絕不嘢小，第一眼看見鵝蛋形的座廁，設計新穎時尚。淋浴室以玻璃門間成，淋浴時不會淋濕座廁及地板，非常妥貼。天花亦裝上按摩淋浴花灑頭，設計像酒店。芝齡偷笑說：「沖涼應該係最享受一刻，自己屋企點可以求其，廁所廚房同我男友間屋都係我設計，媽咪同男友都讚，好有滿足感。」今年年尾芝齡與男友 David將會結婚，斷估 David點都唔敢彈未來老婆啩？
廚房走型格路線，爐頭上的強力抽油煙機，能徹底吸走泡菜的濃烈蒜頭及辣椒味。 
「媽咪鍾意大部分調味料、甚至飯煲都要用韓國嘢，仲要喺韓國買返嚟！」堅持走韓風。 
有媽咪在家，雪櫃總是載滿食物，「以前一個人住，個雪櫃空㗎，依家無論幾時都唔會餓親。」
韓國人無酒不歡，芝齡亦不例外，「我同爸爸都鍾意飲酒，佢乜酒都飲，我就比較鍾意紅酒。」 
洗手間設計看似簡約，配套卻像酒店，鵝蛋形的座廁原來有名堂。「呢個廁所設計之前攞過獎，係防菌廁所，仲話任何有病菌嘅人坐落去，都可殺菌咁話。唔知真唔真，因為我冇病，哈哈哈……」 
廁具都用高檔貨，而磁磚牆身一部分卻貼上金碧輝煌牆紙，為 cyber浴室錦上添花。
水喉又是玩嘢之作，若開凍水會出現藍色光，熱水則現紅色光，粉紅色則是暖水。 
採訪、撰文：石子青
攝影：周義安
留言列表
