揞名爆
「學生王子」扮型又無品
做娛樂圈呢行嘅，個個都想走喺時代嘅尖端，但真係做到嘅，無幾多個囉！懶型嘅，就數都數唔晒。
嗱，又係咁意舉個例，讀書時已經做歌手嘅「學生王子」，沉寂過一輪，早幾年又翻生！咁翻生原本唔係問題嘅，問題係佢自信返晒嚟之餘，仲以為自己好潮嗰吓弊！有一次，呢位大眼歌手行入一間潮服店，指住幾對便服鞋話要試。好啦，咁店員咪拎俾佢。
點知……阿「學生王子」竟然將對對鞋都踩踭，然後喺塊鏡度左照右照，睇到班店員眼都凸埋！係，嗰排有某潮鞋係興踩踭去着，但唔係款款鞋都要咁着囉。同埋踩之前，係咪都要問吓人呢？唉，人哋見佢係星，俾兩分薄面，忍住唔出聲，跟佢去嘅助手就滴晒汗。
最後「學生王子」將人哋舖頭啲鞋嘅踭都踩勻踩扁，但就一對都無買喎！話晒都讀過大學吖，估唔到連「將心比己」四個字都唔識囉。
全站熱搜
留言列表
