每週一大廚

巴東牛肉

印尼菜不及泰國菜受港人歡迎，印尼菜館 So Bali Bali老闆娘 Ruby卻不怕挑戰難度，在租金貴、市場細的情況下，仍然堅守這盤生意，希望推廣家鄉菜式︰「我媽媽是印尼華僑，自細喺屋企食印尼家常菜，薯仔餅、巴東牛肉之類，由細食到大。香港唔算多印尼菜館，其實印尼菜好好食，喺外國都好受歡迎，我想俾多啲香港人試吓，大家可能食完之後會鍾意。」

Ruby經常飛印尼，去當地買食材、試菜、請大廚，也去廚藝學校學廚。「我一直鍾意煮嘢食，不過開餐廳都係找專業大廚掌廚比較好，我平日都會入廚房向大廚偷師，舊年去了雅加達上烹飪班，試試學校的菜式和屋企的有咩分別。」印尼菜烹調方法不花巧，最重要是運用多種香料，以及注重火候時間。「其實巴東牛肉唔難煮，係要落好多香料，一般印尼或泰式雜貨鋪都買到。」竅妙在於處理香料， Ruby分享心得，「我會用石磨去擂香料，味道會更出，就算平時屋企醃雞翼，香料都會先擂一下，根本是習慣。煮巴東牛肉就更加要將香料炒香，出味之後才加入牛肉去炆，炆夠五個鐘，間中攪吓以防黏底就可以，冇乜特別技巧，係花時間，但一定好食。我鍾意用金錢𦟌，肉質腍啲，亦可以加牛柳，兩種一齊配搭，口感更豐富。印尼人會炆好一大鍋，可以放成個星期，幾時想食就翻熱，配白飯就係一餐。」 Ruby炮製的巴東牛肉，軟腍入味，汁醬收得乾，味道很濃，杰身啱撈飯，做法簡單，應該第一次煮就會成功。

材料

蝦膏　 15克
沙林葉　 2紮
香茅　 6條
檸檬葉　 25塊
薑　 1小個
南薑　 1小個
粗檸檬　 1個
八角　 3粒
丁香　 3/4茶匙
紅葱頭　 4粒
葱頭　 2個
指天椒　 3至 4隻
豆蔻　 2個
肉桂皮　 1條
肉桂粉　 3/4茶匙
紅椒粉　 3/4茶匙
糖　 1茶匙
鹽　 1茶匙
胡椒粉　 1茶匙
長青紅椒　 4條
番茄　 2個
阿參果　 2湯匙
椰汁　 2杯
金錢𦟌　 1.5公斤

步驟

❶金錢𦟌切一吋厚，汆水，備用。
❷將長青紅椒及番茄切成細件，阿參果輕灼，備用。
❸將香料先切細，然後用石磨磨成蓉。
❹除了牛肉和椰汁，所有材料加入鑊中炒香。
❺放入金錢𦟌，略煮至表面轉色，然後加水至剛蓋過牛肉，以大火煮至滾。
❻加椰汁，滾起後，轉細火炆 5小時，間中攪拌。

❹ 

❺ 

❻

飲食特務 B
阿鴻小吃　將軍澳有得食

滷水鵝片（前）$188滷水鵝掌翼（後）$138 

滷水小食出名到攞米芝蓮一星的阿鴻小吃，北角店長期出現人龍，機場分店又遠，現在有好消息，將軍澳的新派上海菜晉薈都會供應！晉薈派出師傅到阿鴻小吃跟鴻哥學藝，煮滷水、切法、處理雞腳筋等都學到，店裡會增設滷水檔，供應滷水鵝、鴨舌、麻香雞腳筋、南乳粗齋、撈麵等九款阿鴻招牌菜，外賣返屋企都得。

地址︰將軍澳唐德街 3號九龍東智選假日酒店 2樓
電話︰ 2623 2333
營業時間︰星期一至六 11:30am-3pm， 6pm-11pm
星期日及假期 10:30am-3pm， 6pm-11pm

沙田
新酒店自助餐

Marriot旗下的萬怡酒店進駐沙田，選址第一城附近，近馬鐵石門站，交通算方便。餐廳 MoMo Cafe主打自助餐，有開放式廚房及即煮 counter，晚市食物近八十款，包括小龍蝦、麵包蟹等海鮮，熱盤推介煎鴿及石燒牛扒，以平日$388的價錢來說，比旺區平一截。除了早午晚自助餐及散叫餐牌，周末更供應 tea buffet。

地址︰沙田安平街 1號沙田萬怡酒店 2樓
電話︰ 3940 8788
自助餐價錢︰午餐 11:30am-2:30pm成人$228/小童$114（星期一至五）成人$268/小童$134（星期六、日及假期）
晚餐 6pm-10pm成人$388/小童$194（星期一至四）成人$448/小童$224（星期五至日及假期）

Ruby So

於中環蘇豪開設正宗印尼菜館 So Bali Bali，媽媽是印尼華僑，家鄉在泗水。一年必去印尼幾次，飛峇里、雅加達、泗水等地，度假探親之餘，順道為餐廳入貨，去年更曾到雅加達廚藝學校上短期課程。

撰文：黎狄敏
攝影：胡春輝