從事 IT業的 Stanley(左)和 Terry(右)以兼職形式,於網上賣鑽石,「公司仲喺起步階段,暫時都冇諗過全職搞,唔想畀自己太多壓力。」 

創業通

網上賣鑽  IT男月賺 5萬

隨着團購盛行,香港人對網購接受能力漸高,連高消費品都一樣可以上網購買,像兩位從事 IT業的 80後 Stanley和 Terry,因認識到鑽石供應商,便膽粗粗開網店賣鑽石,把慳回來的租金用作宣傳費,既在 Yahoo、 YouTube賣廣告、又拍微電影等,吸引到不少年輕客人,二人以兼職形式營運,公司開業 1年已月賺 5萬。

 

走進位於尖沙咀商廈樓上的 Difeee diamond店內,經過雙重門後,還以為會看到滿櫃閃爆鑽石,誰知店內竟然像一個普通 office,放着一張辦公桌,沒啥特別,但訪問開始不夠 10分鐘,店員應記者要求,運送了幾顆裸石及鑽石首飾到來。「我哋 office唔會放貨,客人想睇咩款,我哋可以去附近供應商攞過嚟,路程只係 5分鐘。」
店鋪不像坊間的金鋪般,裝滿射燈,他們反而着記者把鑽石放在桌上的白紙上,再打開白燈欣賞。「平時金鋪開晒射燈,粒粒石望落都好閃,根本睇唔到真實嘅顏色,所以我哋會用白燈配白紙去睇。」每件產品均有國際證書,資料詳盡之餘, Stanley和 Terry又細心地教記者如何看顏色、切割等,感覺專業。「我哋仲有支測試筆,只要接觸石嘅表面,就知道係咩物料,好似寶石會顯示紅色、合成石係黃色、鑽石就係綠色。」
最叫人心動的是價錢比一般街鋪平約 3成,像一顆 1.17卡鑽石,只售 5萬多元,「我哋主要賣裸石,如果客人要求鑽嵌,我哋只係收番成本價,例如收番戒指托嘅價錢。」店鋪還設有免息分期,不用支付手續費,令記者也心思思想買番粒石。「我哋做網店加上樓交收,可以慳到租金,鑽石價錢一定會平好多。」


網上賣戒指會列明不同種類和款式,方便客人瀏覽。 

店鋪主要售賣原粒鑽石(裸石),圖中分別是 3.03卡裸石,直徑 9.22-9.25mm,售$554,800,及 6卡裸石,直徑 11.56-11.62mm,售$1,070,000。 

識供應商兼職試業

看到二人如此專業,還以為他們在這行打滾很久,原來二人均是 IT出身,去年才兼職搞鑽石生意。「我哋舊年踏入 30大關,覺得要試吓創業,咁啱因為工作關係,識到個珠寶供應商,可以提供到鑽石貨源,雖然我哋最熟 IT嘢,但見外國流行網上賣鑽石,所以想試吓搞網店。」
由於他們與供應商相熟,故此不需先入存貨,令開業成本大減,「供應商提供產品嘅 list畀我哋,全部都係有證書嘅鑽石,我哋放晒資料上公司網頁,客人可以見到資料同相片,佢哋揀啱心水或有個 budget,相約上嚟睇實物,到時我哋先到供應商度借貨,客人買咗,我哋先畀錢。」沒有入貨負擔,他們又懂得自己寫網頁,故此只花 9萬,於去年 4月開業。


近年 Stanley和 Terry加入珠寶首飾產品,這條手鏈上共有 110粒鑽石,重 32.84卡,售$687,500。 

測試筆可 check到不同物料,如寶石類會顯示紅色、鑽石則是綠色。 

拍微電影宣傳公司

因為沒有街客,二人便想盡辦法宣傳,除了網頁、 facebook外,還在 Yahoo、 YouTube賣廣告,可惜頭 1星期沒有收到任何電話、電郵,不禁信心動搖,「好在大家都係兼職去搞,同埋都有啲親友嚟幫襯。」幸好等到 4月尾終於開到第一張訂單,「係個後生仔,想買粒鑽石嚟求婚。」
見第一個客人是年輕人, Stanley和 Terry為了打這班年輕客群,他們花了 2萬元,請人製作了一套卡通短片,放上 YouTube宣傳,「客人反映番個內容好悶,唔夠吸引,結果只係得千幾人瀏覽。」吸收教訓後,他們於今年情人節改用以愛情故事形式拍攝了一段微電影,雖然花費約 7萬,但瀏覽量達 4萬多,效果不錯,「雖然實質唔知多咗幾多客,但查詢同我哋網站嘅瀏覽量比之前多咗 3、 4成。」


他們設有加工服務,如鑲嵌戒指只收$1,500至$3,000成本價,圖中戒指為 1.17卡,售$57,850。 


客人 Kenneth一直以嚟認為鑽石價錢愈貴愈好,但佢哋教我應該揀自己需要嘅鑽石、鑽飾,同埋佢哋嘅價錢好合理。

申請咭機方便收錢

鑽石始終是高消費品,動輒數萬元起, Stanley和 Terry坦言最初也有客人擔心真假問題,「佢哋有時上網睇到,嚟到再睇實物,都會好猶豫。」尤其是初期,公司因為是樓上鋪關係,銀行不肯批碌咭機,不能用 EPS、 VISA等,「試過有個男性客揀好咗粒石,但冇咁多現金,就叫我哋陪佢去㩒機,點知㩒完錢,佢又驚我哋呃佢,最後都冇買到。直至公司開始有業績,可以安裝到咭機,𠵱家收錢方便咗好多。」
不過他們又笑言,曾見過有位藥材廠老闆,拿着五十幾萬現金來買鑽石,「個客約五十幾歲,佢話咁多年都冇買過嘢畀太太,所以今次要買份貴重嘅禮物,揀中咗粒五十幾萬嘅鑽石,用膠袋袋住成堆現金,場面好震撼。」
為加強客人對公司信心,他們又申請正貨標籤,但又再碰釘,「我哋去香港珠石玉器金銀首飾業商會同港九珠石玉器金銀首飾業商會申請,搞咗半年都被拒絕,於是我哋向政府反映意見,香港知識產權署就介紹咗個零售商會畀我哋,最後 1個月就攞到個正貨標籤。」


去年再花 7萬拍微電影,以求婚作主題,反應甚佳,瀏覽人次達 4萬多。 

男性客佔 7成生意

公司開業只得 1年,每月有已約五、六十位客人,月賺約 5萬。「其中佔 7成係男性客,大多數買畀另一半。男仔嘅購物模式同女仔唔同,佢哋鍾意資料性,所以我哋會提供好多有關粒石嘅資料,好似色澤、證書等,切合我哋公司嘅方向。而且口碑好重要,通常客人年紀差唔多,一個客要結婚,好快又會介紹朋友嚟買石。」
為吸引更多女性客,原本公司只主打原粒裸石,不過最近已開始入埋珠寶首飾,希望令客人有更多選擇。 Stanley和 Terry四出搜羅不同禮品,隨購物附送,如 GODIVA朱古力禮券、韓國「后」美容產品等,「我哋今年開始仲會推出 upgrade服務,客人攞番舊產品返嚟,我哋會以 8折回收,再畀佢哋以回收價多 1倍價錢, upgrade買其他產品,希望可以 keep到班熟客。」


Stanley(中)和 Terry(左二)剛於今年 3月接受香港電台《 MADE IN HONG KONG》訪問,教聽眾揀鑽石。 

Stanley和 Terry搜羅不同禮品,隨購物送給顧客,如圖中韓國「后」美容產品。 

 

開業成本
租金:$0(自置)
裝修:$25,000
器材:$30,000
宣傳費:$35,000
總投資:$90,000

每月收支
租金:$0
入貨:$1,360,000
人工:約$30,000(連老闆共 3人)
宣傳費:$30,000
雜項:$30,000(禮品及其他)
營業額:$1,500,000
盈利:$50,000

Difeee diamond
網址: http://www.difeee.com 

申請正貨標籤


申請正貨標籤,令顧客購物更有信心。 

知識產權署在 1998年成立「正版正貨承諾」計劃,鼓勵零售商會會員作出售賣正版正貨的承諾,允許發標籤的機構包括香港珠石玉器金銀首飾業商會、港九珠石玉器金銀首飾業商會、港九電器商聯會、港九藥房總商會有限公司等。
想申請正貨標籤,可向有關商會提出,商會得到申請公司資料後,會派員到申請公司視察及了解業務情況,經商會開會批准後,便可得到這個標籤;而參與計劃的商戶會員,均要不售賣或經營冒牌或盜版貨品,保證所售全為正版正貨,並於店內張貼「正版正貨承諾」標貼及座枱咭。
參考網頁: http://www.ipd.gov.hk/chi/promotion_edu/no_fakes.htm 


撰文:洪芳俠
攝影:彭自維
部分圖片由被訪者提供

arrow
arrow
    全站熱搜

    tvb4life 發表在 痞客邦 留言(0) 人氣()