4位 Free Chat成員個個笑容滿面,又極之亢奮,唔會估到拍攝時,已經企咗喺旺角成 3個鐘。成員分工仲好有默契,(右起)最高的 Eliz主力舉高 banner、阿甘派傳單、 Miffy負責睇檔,然後阿 Jade負責影相留念。一有人停低,四人就一哄而上開始吹水。 

今日好玩嘢

兜口兜面任你傾  MK新興 Free Chat

日日玩 WhatsApp、 Line,連傾電話都慳番,你到底幾耐冇同人面對面吹水傾偈?𠵱家行出 MK條行人專用區,睇表演要畀錢以示支持、成堆易拉架 sale屎捉你幫襯,但偏偏有一班人講到明提供免費服務,願意聽你講嘢、同你吹水。呢班 Free Chat生力軍,背後各有故事,但目的只係想大家一齊見面吹水。學城城話齋:「一齊傾傾呀!」

我想香港人開心啲


喺人潮中, Eliz跟路人阿健傾咗 20分鐘,其間冇卡拉 OK、冇歌舞,實在係行人區中少見。 

四位學生嘅組織稱為「 Facetoface Free Chat!」最高大、負責舉牌的 Eliz話:「我哋成班 friend有中學生有大學生,當初係喺 WhatsApp吹水,想搵啲嘢搞吓,傾傾吓覺得香港人太多怨氣,所以就諗出 Free Chat呢個活動,畀香港人有個地方宣洩一下負面情緒,開心番啲。」阿甘、 Miffy就負責睇檔;至於第4位成員 Jade就負責用單反紀錄 Free Chat行動過程。

食飯追女乜都吹

開檔 3個鐘,停低傾偈的途人都唔少,所以 Eliz好開心咁話:「今日係我哋第一次出嚟旺角擺檔,開頭好驚冇人理,拎出嚟嘅凳仔又太細張,搞到用唔着。不過我哋由 5點企到𠵱家,諗都諗唔到有咁多人願意停低同我哋傾偈。有人話佢鍾意咗個女仔唔知點算、有人問我哋去邊度食飯好;亦有人走嚟話我哋無聊。」


由傳單到檔攤都係手繪,密密麻麻寫滿 Free Chat目的,下次經過記得望一眼。 

玩家有 Say


傾完一輪,阿健力表支持,直頭出動私伙 Note II,幫手吸引人埋嚟。 

阿健:個個都好 nice
我好鍾意呢種面對面嘅傾偈方式!佢哋個個都好 nice,同佢哋傾偈好舒服,感覺真係傾咩都得。我哋話題真係好多,由我自己生活到同性戀嘅討論都有,好好玩!

 

朱小姐&吳生:唔熟冇咩好傾
我哋停低咗只有 1分鐘,最初係吳生話自己好多嘢同人傾,不過埋到去又發覺唔係咁講到嘢,始終唔熟係好難傾!

擺檔後感

因為行人專用區要解封畀車行番,我哋 10點鐘左右就離開,但有唔少人話下次行開旺角會再搵我哋,仲有人留埋 contact話想加入我哋個 team,真係好開心!完咗今次 Free Chat, Eliz發覺透過傾偈令其他人開心並唔易做到:「覺得自己人生經驗唔夠,未必可以解開人哋心結,所以我哋決定改變少少,任途人講乜都得,總之希望可以派到開心畀其他人就夠。」想出 MK搵佢哋吹水,即 like佢哋 facebook專頁, check住下次活動日子啦!


阿 Jade砌檔最貴係呢個企唔穩嘅金屬架($200),本以為可令檔口「高大」啲,𠵱家覺得使得唔抵。 

諗嘢檔我哋想了解香港人

叫得做「新興」, MK當然唔只一班人搞 Free Chat啦。兩位唸哲學的青年 Aston同 Ian話:「我哋由中學識到𠵱家,兩個咁啱都係讀哲學。由 08年開始,我哋就想做唔同嘅『思考實驗』,因為當時覺得香港人唔諗嘢、唔同人傾偈。有試過印貼紙周圍貼,希望引起香港人思考。不過好似唔夠雙向,結果就諗到走出旺角行人專用區,整一個 Free Conversation的平台,畀香港人發言,等我哋了解吓香港人到底係點。」

下次要跳出 MK


搞 Free Chat的兩個主腦(左) Aston同 Ian,都係讀哲學出身,不過唔一定要搵佢哋傾哲學嘢,講乜都無任歡迎咁話。 

佢哋話已經搞咗約 68次,仲發現香港人思想並唔係佢哋原先諗到咁樣,即係點?佢話答唔到喎!
佢哋話,每次 Free Chat完都帶住開心、同一堆問號離開,因為每個人帶畀佢哋嘅故事都唔同! Ian話:「開心係因為有得着,好似有一個中年叔叔,坐低講我哋知佢坐牢嘅經歷,然後覺得出獄後呢段生活,係佢一生人最快樂嘅時光。」最記得嗰位叔叔話:「我雖然住公屋,不過我覺得自己住緊城堡。我哋好替佢開心,但同樣都引起我哋諗更多嘅嘢,例如香港人真係好冷漠咩?唔係。唔只講自己嘢,有人亦都走嚟畀建議我哋,點樣可以搞好呢個 Free Chat活動。好似原先我哋叫做 Free Conversation,但有人建議我哋改做 Free Chat,令件事更入屋。」講到「思考實驗」下一步係點?二人希望帶動更多人做相同嘅事,而且想去唔同地方,同更多社區嘅人傾偈,繼續了解香港人。

玩家有 Say

阿米:好有心
我喺大學讀傳理,聽朋友講有呢班搞 Free Chat嘅人,覺得好得意,所以出嚟睇吓。我覺得佢哋好有心,難得香港有人肯搞呢類唔計較付出的活動,都幾好嘅!

 

Sharon:好學術
我都係經過見到,覺得得意就坐低傾吓。聽到佢哋講尼采、黑格爾、本質主義呢類,真係嚇親!不過兩個搞手不斷解釋呢啲哲學嘢,令到更多人可以參與討論,都唔錯。不過講真,真係好得閒先會再參加囉!

開檔直擊

 


7:45pm擺檔唯一支出就係買入兩個紙皮箱($20), Ian話係向一位執紙皮的婆婆買入,婆婆仲精揀出落雨都冇咁易爛嘅紙皮畀佢,可以各取所需,感覺好好。 

8:00pm因 2人都有正職,落到旺角起壇,正式同第一位伯伯傾偈時已到 8:00pm。 

8:30pmAston傾傾吓,突然走出檔口寫白板,原來係將傾緊嘅話題寫出嚟,吸引途人坐低。 

10:00pm行人專用區時段完結, Ian就執番檔口雜物。原來附近嘅序言書室一直好支持佢兩個,所以畀佢哋存放紙皮、鐵架等物品,仲借出凳畀佢哋。 

貼實資訊

facebook專頁: Hong Kong Thought Experiment思考實驗

奴 COMMENT

其實大家都太依賴智能電話去溝通,連講電話都少咗,有咩都係用個 app去傾。其實面對面傾偈唔單只可以訓練口才,更可以令你增加自信。面對面,不只用口,還要用身體和眼神!支持這一大班有心人,因為溝通的意義就是交流!有很多人都有很多想法、心事或壓力,的確要講出來才可以抒發。
感激熱血的朋友!我建議加些間隔,就可以解決怕醜仔想參加又怕俾人望到嘅問題呢!


撰文:鄺浿鏇
攝影:葉偉豪

arrow
arrow
    全站熱搜

    tvb4life 發表在 痞客邦 留言(0) 人氣()