同學偷車事件轟動城大，但記者發現 Taste員工親自上門收車後，早前屬會宣傳時 Spy仍發現有同學使用手推車（箭嘴）搬運宣傳物品。
U Spy
犯法搵着數 城大生偷超市購物車
浸大宿生會及所屬學會搵深水埗良心飯店明哥𢱑贊助，俾人話佢哋向窮人搶飯食，不過學生水準低處未算低。今期城大學生會《城大月報》 3月號，便大肆報道有學生擅自偷走超市手推車返城大用嚟搬運物資。
報道指近日城大正值屬會內閣宣傳期，為咗方便運送大型展品，有同學公然喺城大附近又一城超市 Taste偷手推車。結果要超市派職員去城大搜尋，足足收回 40架失車，期間有關同學更與職員發生推撞。
城大二五向 Spy爆料：「其實同學已經唔係第一次咁做，過去幾年都試過，但同學都自律還車，所以 Taste都會隻眼開隻眼閉，但今次太離譜，同學先用噴油遮走手推車上個 logo，諗住用完唔還，所以 Taste先派人收車！」
據知校方遲遲未有行動，原來以為手推車係同學俾錢租用，而 Spy八到 Taste向校方投訴後亦搵咗相關同學照肺， Spy問過 Taste，職員指又一城分店根本無借車服務，擺明係不問自取！偷嘢係刑事罪，咁嘅大學生， Spy梗要揭發。
噴走 logo獨吞為隱瞞偷車罪行，同學竟用噴油遮蓋手推車手柄上的 Taste商標，超市員工在收車時雙手亦沾滿油漆，刑毀兼偷嘢，好大罪！圖片摘自《城大月報》 
學生報踢爆城大偷購物車問題嚴重，更上了《城大月報》 3月號的頭版，惹來不少同學討論。 
黃國桐律師擅自推走超市手推車，仲要用噴油遮住個 logo，明顯係蓄意偷竊，最高可以判監 10年。
中大校長變「 Q」板熊貓
上週四，中大為慶祝創校 50周年，搞咗個音樂會，雖然當日落大雨，但仍有 400同學入場。雖然當晚仲有林二汶同 Supper Moment做嘉賓，不過估唔到良心校長沈祖堯上台講嘢先係高潮位。
事緣最近中大仔忽然覺得沈校長個樣激似熊貓，為人又慈祥，十足國寶，甚至連 50周年慶典都用埋熊貓做吉祥物，周圍戙「 Q」板，難怪當日校長一上台，全部學生即高呼「熊貓」，熱情度仲勁過容祖兒 fans，沈校長玩得又有心，其他校長要學吓嘢啦！
沈祖堯校長雖冇即席獻唱，但亦有上台分享他近期作品「了不起的大學」。內容超正經，但都換來全場喝采，可見沈校長的魅力。 
不只台上，在中大校園四周都豎立了激似沈祖堯校長的熊貓公仔，上面仲寫上不少中大潮語，例如「唔追唔知身體好」（即追校巴），真係中大仔先明。
曱甴 Tommy收$3,000 浸大副會長捱鬧
前週五（ 22日），浸大國際學院搞歌唱比賽，仲請到曱甴 Tommy（阮民安）去石門校舍做嘉賓，全場 500多張飛（會員$25、非會員$50）一早賣晒，個個諗住入場睇 Tommy有幾騎呢。
其實當晚 Tommy都冇欺場， Spy八到佢收 3,000蚊，帶住 4個 dancers到場，又跳又唱，仲玩埋招牌亂 rap，氹得同學勁開心，但係當晚條片一放上 YouTube，大班網友就圍插 Tommy，最慘係請佢嘅學生會內務副會長吳婉瑩（小圖）都畀人鬧埋一份，連 rap政治話題好出色嘅 rapper Masta Mic都有份加把嘴，「吳同學根本為散飛先請 Tommy，請佢就等於做膠歌就係王道，你要見不死精神 rapper，我介紹畀你！」
吳同學都有同 Spy吐苦水：「賣唔晒飛，我要負責，佢搞 gag有咩問題？佢帶埋 dancers出騷，其實真係好努力！」校園活動為乜一定要商業化，值得大家諗吓！
當日又 rap又跳又唱的 Tommy唱足 4首歌，講真台下同學冇首識，惟有比較熟的是初出道時 E-Kids同 EO2合唱的〈魅力移動〉，不過全場 high爆！ 
留言列表
