「闊太」無人俾面得個殼
選美出身嘅「闊太」，成日着到身光頸靚出 function，耐唔耐又做吓代言人，近年仲鍾意同啲嫩口富二代玩埋一齊，生活好似好繽紛吓！不過，有圈中人同媽咪姐講：「表面嚟嘅啫！實情佢唔多掂。」
話說「闊太」每年都會同班選美姊妹搞啲慈善晚宴，各人例牌都會向自己有份做代言嘅品牌老細「揼心口」，搵番啲禮物贊助。嗱，咁「闊太」話晒係阿姐級，大家諗住佢一定𢱑到唔少禮物，點知佢每次只攞到幾份「奀雌雌」嘅獎品返嚟，仲話好難先𢱑到㖭！好嘞，到今年「闊太」直情話自己忙，唔得閒揼老細心口喎。好好好！你講到咁，其他選美姊妹咪惟有自己四圍𢱑，順便又問埋「闊太」之前𢱑開嘅品牌老闆啦。嘩，唔問猶自可，一問之下嗰位老闆係咁意都應承送幾十份大禮出嚟！
Well，咁代表啲乜呢？媽咪姐一向只睇事實嘅，邊個攞到最多嘢返嚟，邊個咪最有牙力最有 face囉。你話係咪先，阿「闊太」？
全站熱搜
留言列表
