面對面
小強不息 阮民安
意料之內，與樂壇四小強之一的 Tommy阮民安對話，用了大半時間解釋他各種各樣的欠債傳聞。
最經典是 06年被賭場債主從澳門挾返香港事件， Tommy話：
「黐線！根本就冇賭錢、冇俾人挾返香港，嗰個人陪我搭船之嘛，仲一路好好傾添！」
「咁你有冇借人 10萬賭本先？」
「梗係冇啦！係佢哋叫我做 VIP，開個有 10萬本金嘅智財咭之嘛！」
「咁咪即係借錢囉……」
「填咗張 form咋，張 form好似卡拉 OK入會表格咁，五顏六色，好靚㗎！」
「咁咪即係借錢囉……」
「唔係呀……不過張 24萬欠單，我真係有簽……」
「冇爭錢做咩簽欠單？」
「嗰朝有個電台直播要做，我無論如何唔可以失場，唔簽欠單，佢哋唔走吖嘛……」
經過以上對話，我認為， Tommy可能爛賭，不過致命傷，其實是太傻太天真。
33歲人， 10年間敗掉家裏 200多萬身家，仲爭緊前老闆林小明 10多萬舊債未清， Tommy口講話早就放棄了明星夢，卻放不下明星排場：出入化妝髮型助手保母車缺一不可，身上穿的是剛從日本自置的五位數字新裝，坐飛機一定要坐 business class（因此才會在候機室巧遇偶像 G-Dragon）……花的比賺的多，他說這是獨立藝人的生存特色：「如果成件事有大公司 back up，其實好合理。
就係因為我係獨立藝人，淨係可以間唔中先至彈啲嘢出嚟打游擊，啲人咪覺得我死極唔去囉……」
用這種頭腦這種邏輯竟然也能存活到今天，這就是為甚麼，阮民安的名字今時今日見極都有，唔理好醜，總之一日未斷氣，就得！
我當你兄弟
逐個欠債傳聞逐個解釋，我想我的嘴全程維持「 O」形，持久度是訪問以來最久一次。澳門單嘢，最後由寰宇老闆林小明出面，由 24萬講數講到半價，阮媽媽負責埋單。
11年傳聞借林雪個朵借貴利：「黐線！點會？你問阿雪就知唔係真！」
12年涉嫌炒賣 BIGBANG黃牛飛：「大家用腦分析吓，如果係真，警察點會放我走？」
今年又傳出做租霸， Tommy終於拿出證據：「間物業公司搞錯，佢哋最後都有出聲明還我清白！」
娛樂圈咁多人，點解次次揀正你嚟屈？「我都問過身邊朋友呢個問題，佢哋話，因為我成日當人兄弟，乜都唔同人計。不過我唔同佢計，佢同我計囉……」
最新被「兄弟」反目事件，是 09年與周秀娜師弟喇英合作開 studio，最近被對方追討 5萬裝修費：「呢單嘢仲好笑，其實我唔想講，但係次次我唔講，係唔係就要我食晒啲死貓呢？……我由頭講件事畀你聽……」
Tommy接着用二十分鐘細數與喇英恩怨，自己如何發掘捧起男子組合 Bro5、第一代 Bro5唔爭氣，記招前一日因為藏毒四人組合被拉三個； Tommy不認輸再找人組成新 Bro5，好不容易爭取到了日本表演機會，被喇英隻跳線碟斷送前途；深生不忿之際， Bro5竟然跳槽做咗周秀娜師弟，亦就是這一刻，才發現公司商業登記根本沒自己的名字：「錄音、排舞、拍 MV、請人、保母車，仲有去日本機票酒店，樣樣都係錢，我前後出過 100萬，我都冇同你計，你同我計？你冇嘢呀？」
情況雷同澳門事件， Tommy話冇借錢，人哋手上卻有 24萬欠單；開公司 100萬花費， Tommy話「嗰啲單點會 keep！」，不過那 5萬裝修費， Tommy就偏偏有簽下借據給喇英。別人叫他簽欠單，他肯簽，但是公司成立全程他卻沒參與，到拆夥一日至知商業登記沒有自己大名，哪有人如此這般做生意法？
「我都唔係做生意！我諗住兩兄弟拍住一齊搏之嘛，我當佢係兄弟，佢有冇當我係，我𠵱家咪知囉……」
E-kids似足現今的 Mr.，出道時跟住譚校長巡唱：「校長最錫我，話我似溫拿入面嘅佢自己，係我衰，夠膽喺佢面前飲醉。」《蘋果日報》圖片
09年帶住 Bro5去日本福岡參加音樂節，現在被成員喇英追討裝修費：「係我用 100萬捧 Bro5出嚟，你評吓理，我未同佢計，佢同我計？」
上月初 Tommy用 5千成本拍攝〈踩我不死〉 MV放上 YouTube，至今點擊將近 20萬：「你哋咁鍾意踩我，我就踩盡佢，咒埋自己死，邊個夠我玩？」
玩 G-Dragon MV上位， Tommy被 fans爆在南京機場候機室纏住 G-Dragon合照：「用吓腦諗啦，人哋有 8個保鑣跟住，我想纏就纏到咩？其實係佢主動行埋嚟！」吓！
出道 10年，我問 Tommy到底靠甚麼維生？「做騷囉！」
現在銀行存款大概有多少？「咪咁囉……」
有錢拿回家孝敬父母嗎？「唔多囉……」
那麼 10年來用了父母多少錢？「幾個七位數字，大概 2、 3百萬。」
我想，阮爸爸阮媽應該對這個兒子很失望吧。「佢哋失望，唔係失望我仲留喺呢個圈，最失望係我曾經真係做錯過。」
阮民安一家人都是虔誠基督徒，爸爸做宗教圖書生意、媽媽教書、大哥傳教、二哥在大公司做經理，小康之家而已， Tommy卻有能耐花掉家裏 2、 3百萬身家：「我睇錢唔重要，我做呢行係因為一個堅持。我仲記得十年前會考 1分，阿媽嬲到爆，於是送我去新西蘭讀書。二月要出發，我一月參加咗 Stareast嘅 E-kids選拔賽，千幾人參加淨係 26人入選，一知道自己得咗，二話不說由新西蘭飛返香港。學費、留位、書簿費，阿媽畀咗 10幾萬咁就冇咗，嬲到呢……成個月開飯冇擺過我個位，當我冇到。但係當佢見到我為咗受訓兩個星期減肥減咗 32磅，就知我真係有決心。」
由反對到支持， Tommy話因為當年自己做 E-kids真的做出成績：「你哋覺得我符碌，我知自己唔係囉。 E-kids第一首歌就係我自己寫，作歌同 MV創作我參與最多，形象亦好多都係由我搞。我知自己唔係靚仔，我哋邊夠天佑同又南靚仔呢？但係我絕對唔係符碌囉！」
E-kids 4月重組，海報卻只得 Alan同 Tim份：「佢哋有搵我，重組 E-kids係我夢想，但係唔係𠵱家。」
Tommy假假哋都係 E-kids當年最受歡迎一個， 06年 E-kids解散被林小明簽約力捧，你覺得 Tommy沒有紅過， Tommy卻說自己當年紅到鬆毛鬆翼過：「可能我得意啩，最多𡃁妹鍾意。我都唔知自己有咩好，但係老細又肯簽我、我嘅要求又願意配合喎。我咪覺得自己好勁、一切理所當然囉，咁就開始囂，開始去到邊都驚死人唔知我係邊個啦！你明唔明，飲酒有幾衰啫（ 06年 Tommy因為醉駕被罰款兼停牌）？個個都飲酒㗎啦，我夠膽死喺福祿壽（ Stareast老闆陳百祥、譚詠麟、曾志偉）面前飲，老闆都未醉，我醉先呀！呢個係態度問題，所以我覺得 06年發生澳門嗰件事，係上天懲罰我。」
我有一個夢
死極唔去， Tommy話，因為他還有一個夢未圓，不是明星夢，是 E-kids夢：「明星夢 10年前入行真係有發過，但係一早醒咗，我應承過 E-kids，有朝一日我掂咗，一定要帶埋佢哋兩個出番嚟。」
Tommy深信自己要是 7年前沒衰過澳門一役，已經紅咗：「嗰陣時我拍個 MV用咗公司 10萬，係去泰國搵彭氏兄弟幫我拍；做歌搵當時拍住陳冠希最紅嘅陳奐仁；唱歌請老師陳潔靈合唱，我都唔知自己憑乜嘢，但係老細又畀我喎……我話你知，公司都話，唔係澳門單嘢，我好大機會跑出；屋企人親戚話個個 DJ都播我首歌，嗰年係我第一次有歌上晒咁多間電台榜；公司仲話，連啲平時唔鍾意我嘅 DJ，好似周國豐同卓韻芝，都播我首歌、讚我！澳門之後，我一個人返咗橫店拍劇，喊到崩潰，因為睇唔到未來，因為我知道自己一夜之間冇晒咁多年建立嘅嘢……」
別人說 Tommy像小強，不是沒有道理的。林小明次次開戲預埋 Tommy，他反而要解約；譚詠麟叫他有需要致電求救，他說不要求人； E-kids另外兩子叫埋 Tommy開騷，他也因為時機未到而拒絕， Tommy的腦袋還有層外殼真的硬倔如小強：「我眼見好多藝人冇咗經理人會死，我真係好憎呢種藝人，我係嗰種死都要死喺自己手上嘅人。林小明同阿倫，我唔係唔搵，不過唔係𠵱家，唔係去求佢哋扶我一把，係到我有一日掂咗就會搵。 E-kids一定要重組，不過我一直係諗住有一日我紅咗，要帶佢哋兩個返嚟。呢個 timing唔啱，我哋唔同 Shine，人哋係做完黃偉文個騷先至帶起個話題吖嘛……」
你班茂利
因為一首翻炒 G-DragonMV的〈踩我唔死〉， Tommy回歸樂壇，知名度更攀上歷史高峰，來年出碟、演唱會、 talk騷計劃多多：「我哋呢啲獨立藝人，係要喺能力範圍內搞啲嘢出嚟曝吓光。呢單嘢明幽自己一默，但係網上有班茂利喺度話我侵權又話要告我。咪懶醒啦，我拍出嚟玩之嘛，又唔係牟利，我做之前梗係搞清楚先啦！」
Tommy話今時娛圈不同往日，不是大公司大水喉至有得做，有橋大把渠道發圍。聽落幾有諗頭幾清醒，不過說起上週飛去日本傾秘密大 project，老毛病又發了：「我白癡到走去機場唱錢，唱緊 1兌 8.9時醒起上網 check，原來銀行做緊 8.2。我問唱錢嗰個咁即係點，佢嗱嗱聲幫我數埋錢叫我簽張紙，咁我咪簽囉……」
06年衰完一鑊又一鑊， 3月醉駕被捕後，再發生澳門豪賭事件：「出咗事我返咗橫店同霆鋒拍劇，我同霆鋒玩啤牌，大我 5百蚊都要諗幾個字，佢知我唔係嗰啲人。」《蘋果日報》圖片
06年從 Stareast轉投寰宇林小明旗下， 09年提前解約獨立發展， Tommy曾經與裕美及寰宇同門江若琳傳出緋聞：「有啲緋聞係真，但我唔講得。」《壹週刊》圖片
撰文：朱小博
攝影：范仲良
留言列表
