李思雅慘被摸籮 陳庭欣遭抽水
同是港姐出身的無綫藝員李思雅（Cindy）和陳庭欣（Toby）早前到法國採訪賽車，拍攝期間二人都遇不快事，先是Cindy差點被劫，然後更遭一班外籍男士狙擊「八月十五」，由於當時要拍攝有氣氛一刻，Cindy只好啞忍及強顏歡笑，直至完成拍攝才閃人。而Toby亦遭醉男攬腰，此行果真是蝕底之旅。
李思雅和陳庭欣早前為無綫到法國小鎮勒芒採訪24小時跑車耐力賽，網球好手Cindy於10多年前曾到法國看網球賽，今次重踏法國，本來很開心，出發前更相約Toby到巴黎玩三日，但在勒芒拍攝時就遇到不快事。Cindy受訪時表示，她在街頭差點被搶袋：「當時有兩個吉卜賽人叫我幫佢哋影相，佢哋唔係講英文，我以為係幫佢兩個影，點知佢哋一個叫我幫佢影，一個只係企喺我身邊，好似想有行動。我都算醒目，一手攬住個袋喺心口，一手影相，跟住即刻走。」
啞忍為保氣氛
之後Cindy遇上更驚險的事，她於賽車場內拍攝一個多位車迷圍在一起、甚有氣氛的鏡頭時，有多位外籍男士圍着她，當時有位男士突然挨在她身上，之後Cindy更感到有人摸她背部，接着又感覺到有多隻手摸她屁股。Cindy憶述當時被博懵的情況時謂：「因為我唔想NG，所以頂硬上冇出聲，都幾難受，（點解唔即時彈開？）因為要拍個好有氣氛嘅鏡頭，驚之後冇咗嗰個氣氛，好在我當時着住好厚嘅賽車手衫，感覺冇咁難受。其實拍攝時好多人會扮熱情攬住我哋，有時見唔對路都會閃開。」
李思雅拍攝一班外籍車迷圍住的情景時慘被多人在背後齊齊揸屁股。
陳庭欣覺得有些外國人遇到東方面孔時會很熱情。
Toby就目睹Cindy出事，她當時正為Cindy拍照，Toby亦指這些事經常發生：「嗰度啲外國人見到我哋啲東方面孔都好熱情，Cindy要營造氣氛硬食冇辦法，之後啲工作人員都睇得好緊。我就試過有啲飲得好醉嘅男人走埋嚟，仲攞啲色情雜誌出嚟，都好尷尬，跟住有人忽然攬我腰，貼到好埋，真係過分熱情。」
繼續巴黎行程
雖然兩位靚女都遇到不快事，但採訪完畢都繼續巴黎行程，二人於巴黎鐵塔下扮咀嘴及狂跳影相，又去了看紅磨坊表演。二人又於巴黎市中心吃海鮮，問有否血拼名牌？Toby謂：「我買咗好少，Cindy買咗好多名牌，我全程做佢貼身保安咁。」
另外，Toby昨出席活動時坦言平時喜歡到美容院，但只會做facial，問有否考慮打botox？她說：「好怕打針。（對自己有信心？）唔需要大搞囉。」對於新一屆港姐選舉將展開，Toby指未有機會留意參賽者質素，對於今年港姐出埠被指像「伴遊」，Toby說：「我當年去印度都有團隨行，不過都好，可以畀佳麗嘅家人隨行打氣。」
文：影視組
高海寧喇叭殺退鹹豬嘴
高海寧於2010年到南非採訪世界盃時，也差點被球場內的球迷強吻，高海寧昨接受電話訪問時謂：「嗰陣我拍緊球場內嘅場面，見到有個外國球迷戴摔角手面具，咪同佢傾幾句，當時佢搭我膊頭，之後仲想錫埋嚟，好在拍檔Keyman（馬啟仁）醒，用打氣嗰啲大喇叭吹佢，咁咪救咗我。」問高海寧平時外景攝製隊會較少人，會否較危險？她謂：「唔會，我上次去南非都安全度過40幾日，公司安排得好完善，但意外好難避免，做女仔要小心保護自己，遇到唔舒服要即時出聲，就算拍唔到啲特別鏡頭，同事都唔會怪你。」
而呂慧儀接受電話訪問時表示，試過獨自到法國旅行，玩自拍時突然被一個男人攬腰、頭貼頭影相，但慧儀覺得外地文化跟香港不同，所以沒感不快，說到被摸臀部，她就謂：「如果係就兜巴星啦，不過我都係得個講字，可能遇到嗰刻都唔識反應。」
高海寧曾與馬啟仁到南非採訪世盃。（資料圖片）
兩港姐同惹負評
李思雅和陳庭欣入行以來黑仔事件一籮籮，當中以2010年港姐冠軍陳庭欣較黑仔，她奪冠後卻被封「豬扒港姐」，事件更連外國傳媒都有報道，十分瘀皮。而近年專注做飲食節目主持的陳庭欣，之前主持節目《為食總司令》時，屢遭網民狠批「成日插嘴」、「冇儀態、冇風度」兼「無知」，更由第一集轟到最後一集，雖然她已努力改善缺點，但在第二輯中仍遭狂插。
「聲線高八度」
至於2005年港姐李思雅同樣欠缺觀眾緣，去年無綫取得200小時倫敦奧運播映權，有份任節目主持的她，幾乎每次開聲都遭網民狂轟，思雅的罪狀分別有「聲線高八度」、「把聲超級難聽」及「成日問埋啲多餘問題」等，對於遭狂轟，思雅表示相當無奈，並承諾會改善聲線問題。
陳庭欣（左）主持《為食總司令》時被狠插。
李思雅去年主持奧運節目，但表現未及一眾專業主持。
狼出沒注意WARNING
不少女星都喜歡以性感打扮出席活動，卻往往因而惹上「股災」！
張曼玉
2007年在法國出席電影節活動，當時身穿長裙、露雙肩的她高貴漂亮地行紅地氈，沒想到有人竟在眾目睽睽下對曼玉施展鹹豬手，摸其臀部，雖然慘遭摸臀，不過曼玉仍保持鎮定，未有失儀尖叫。
劉嘉玲
2005年出席活動時，疑被一名設計師摸臀，當時嘉玲跟該設計師及關之琳等一起並排而站，準備影大合照，設計師疑趁機施襲，嘉玲被嚇得大叫，其後嘉玲為免再遭殃，只好捉住對方的手。
劉嘉玲
鞏俐
鞏俐
2010年在上海出席活動剪綵，當時身穿超Deep V禮服的她非常性感，完成活動上車離開時，有人乘機出手偷摸其臀部，不過鞏俐對此只是一笑置之。
留言列表
