關於周麗淇，我聽過的形容詞是：有性格、有堅持、有霸氣，更新版本有「iPad」。

「iPad Niki」跟「A4 Sammi」及形聲字一樣，一睇就明；至於前三有，隨着入行十年的洗禮，訪問時唔多覺。反而周麗淇經常強調：「我個樣唔似會……」

事例一：說iPad

「我個樣唔似會鍾意科技產品，細個仲打機添。個個以為我斯文，o依家呢個名係得啖笑，我第一次睇都唔明。」

事例二：考電單車牌

「我個樣唔似會想考電單車牌，我唔鍾意畀人標籤，冇嘢係絕對嘅。」

三十三歲，周麗淇說她是「盛女」，不是「剩女」，等待緣份中。在天幕下的戀人未現身之際，盛女有平板電腦，一樣可以跳舞。

 

計算學以外

有指上海人精於計算，走每一步也經過細密部署，又帶點小聰明。原籍上海的周麗淇，坦言自己對感情向來謹慎，但不諱言最難以計算的，就是感情這一科。

讀書、做嘢好多時都係掌握喺自己手入面，但係感情嘅嘢，就點計都估唔到。由細到大，我都覺得同我喺埋一齊嗰個人，就係我屋企人，嗰個人同我嘅關係係一世嘅。我拍拖，會諗有冇將來，以後點同呢個人共度餘生，又想生小朋友，所以我 會諗結婚，會憧憬一個好美滿嘅家庭。

但係拍拖始終係兩個人嘅事，係雙方嘅，所以我一定會好小心揀。媽咪同家姐都有問：「你究竟想要咩呀？」坦白講，連我自己都唔知。

周麗淇與鄭嘉穎拍拖五年，舊情不再，但她稱不介意與前度合作，但「真係冇人搵過」。

現時周麗淇自稱單身，加上今年八月便屆三十四歲，堪稱圈中「地標盛女」。難得地她入行十年來的感情史，一隻手數得晒，說得出名字的更只有鄭嘉穎與沙廠太Eric，也屬計算以外的事。

根據我以前嘅經歷，我識嘅對象都唔係玩玩吓，或者係試吓，骨子裏我係一個保守嘅人，我係長情o架！哈哈！而且我有我嘅要求，感情呢啲嘢唔到我控制，亦都好傷身，所以我一定唔會玩弄感情，hurt到人又hurt到自己。

少女不再，周麗淇在《好心作怪》中，罕見地陰沉。

我有行為潔癖

我相信，同一番對白，不論對朋友或是對記者，周麗淇也loop了不下一百次，問她恨嫁與否，盛女的答案是100%的否定。

我有行為潔癖，咩都要完美。係，有好多人催我，同我講：「你求其啦！」咁係咪即係代表我要將就？勉強同一個我唔覺得係完美嘅人一齊？

其實我冇睇得咁慘嘅，都有啲人約會吓嘅，但係都係要小心啲，睇清楚啲好啲。我成日都有問啲新婚嘅朋友，點解可以咁肯定同自己結婚嗰個就係啱嘅人？佢哋都答我：「到時你就自然會知。」

去年周麗淇加盟任賢齊（右）的「大岳娛樂」，製作中的國語碟有五月天操刀。

我諗，我就係等緊可以畀呢種感覺我嘅人。

「The One」未現身，周麗淇就寄情工作，訪問中她不止一次強調自己的表裏不一，在她口中是個樣「斯斯文文」，除科技外，還愛賽車，但也是以實際先行。

好多apps我都會download落嚟試，最近因為成日要睇國語劇本，就成日用一個簡體app，個app譯晒啲對白做拼音，咁我可以用拼音睇一次劇本，發音正確啲。

有傳周麗淇拍國產劇，身價已達十五萬人民幣一集。

 

 

 

周麗淇於去年中與女性友人組單身歐遊團，遊歷期間悟人生。

再單身遊記

藝人新聞，不外乎是非緋聞，周麗淇兩者也未到數，所以連咬字懶音也成談論點，據報她現處橫店拍攝的《大漢賢后衛子夫》，單集價十五萬人仔，當然要加倍專業；廣東話呢？訪問時她字正腔圓，似在主持《笑談廣東話》；而正在播映的劇集《好心作怪》中，她的咬字也躍進了不少。

話我有懶音已經係善意啦！我已經進步咗好多，可能因為屋企講開上海話，媽咪、爸爸、婆婆嘅廣東話唔標準，冇乜人糾正我。到讀書嗰陣又冇人執正，要到做嘢嘅時候先知係懶音。

o依家我日日都有訓練自己，睇書都喺心入面讀一次，睇多啲人哋講嘢嘅口形就OK。

未找到「嗰個人」，周麗淇靠自己也樂得清靜，細數單身好處若干個，她還真的即場數手指，不算絕技，但具一定可觀性。

單身有好多好處，首先唔使陪伴侶先，我可以上course學嘢，我鍾意設計，就去讀一個design嘅課程。去歐洲，同幾個女仔一齊去意大利、法國、西班牙，遊歷幾個月，冇助手，行程自己plan，去唔同嘅博物館，真係可以增廣見聞。

如果拍緊拖，以我嘅性格，一定去埋晒啲浪漫sweet嘅地方，去咩歐洲、博物館吖？實係黐住伴侶，去馬爾代夫！o依家冇乜束縛，可以做自己想做嘅嘢。

一瞬真情流露

周麗淇趁歐遊時，反覆思考她的人生真正所需，自認急性子的她，亦放慢腳步，學懂慢活。

我會諗，咁多年我都只係顧住工作，忽略咗屋企人同對自己好嘅人。好似我講嘢好快，人哋聽到咪覺得我lur囉，所以我o依家連講嘢都慢咗，咁更加可以留意到身邊嘅人同事。

 

談及家人，周麗淇即鬼馬地說：「佢喺度喎。」那個「佢」，是訪問時在另一貴賓室的周汶錡。

細個我哋唔係咁多交流，可能因為年齡差距啦，但係家姐係有佢嘅風範，好顧家。

見到家姐嫁，真係幾感動，但係結婚衝動就一啲都冇，哈哈！真o架，嗰一刻我冇諗過自己，只係要所有嘢都係perfect。我記得嗰日個天有啲陰，家姐驚落雨，因為婚禮喺戶外舉行，我同佢講：「唔會！一定會好天！」

我嘅責任係令佢好安心、放鬆咁結婚，所以大小事都要上晒心，到新人上台一刻，我哋成家人都喊，真係感動。

我哋兩姊妹今世有緣做姊妹，我希望下世都有咁嘅緣份！

左右兩圖，場面設定是周麗淇也在感動中。左圖為○五年她獲頒「飛躍進步女藝人」獎，右為去年周汶錡（右）於法國出嫁，細妹（左）兼伴娘喜極而泣。