國泰航空去年盈利大幅倒退八成三至九億元，表現乃金融海嘯以來最差，令股價於業績後一個月大跌一成半，張耀昌認為國泰下半年可收復失地。（《蘋果日報》圖片） 

亂市出擊揀靚股

股市攻略　風高浪急　揀股唔揀市

早前美國聯儲局局長伯南克放聲氣暗示要退市，加上中國多項經濟數據差過預期，令一向受外圍及內地影響的港股上半年表現不濟，年初至六月中已累跌一成。在「五窮六絕」之後，下半年股市仍波濤洶湧。本刊請來今年初成功預測恒指於第二季出現調整的分析師，以及人氣股評人，揀選潛力股，幫大家在亂市中尋寶。

張耀昌﹕美國好過中國

張耀昌表示，雖然中國的債務嚴重，內銀有隱憂，但有中國政府保護，暫時不會出事。（陳浩樂攝） 

下半年，市場焦點仍在中國。里昂證券中國研究部董事總經理張耀昌，曾於年初恒指大漲時，成功預示第二季出現調整。對於下半年，他指中國經濟未如年初想像般好，仍有放緩跡象，更提醒投資者，要留意中國日益嚴重的債務問題。「中國已經借債成癮，由○八年至今，信貸增長達一倍。中國嘅經濟增長一向都是靠借貸推動，但透過借貸帶來嘅經濟效益不斷下跌，無法長期維持高水平。」
他指出，習李新班子上場後，大力打貪，令消費減少，中國今年全年 GDP增長約 7.5%，未來可能回落至 7%水平。「即使中國政府再出招推動經濟，估計都會增加基建，但東面沿海城市已發展得七七八八，未來發展較落後的中、西部，效益一定會較低。」

聯想國泰受惠復甦

雖然中國表現遜色，但張耀昌認為，下半年股民應該「揀股唔揀市」，避開受經濟周期影響的板塊如資源、零售股，並挑選有增長潛力的股票。他解釋：「中國經濟差，但美國表現不錯，好多經濟數據都好於預期，相信下半年的勢頭不錯，對出口美國市場嘅公司有利。」張耀昌睇好聯想（ 992），因為集團旗下的電腦在美國的市場佔有率上升，加上未來會推出智能手機，價格有競爭力。另一方面，市傳聯想欲收購夏普（ SHARP）中國，擴大智能電視市場，料可增加盈利。事實上，聯想去年全年純利按年升 34.3%，至 6.35億美元，表現不俗。
另外，國泰（ 293）亦可受惠於美國經濟復甦。「燃油價格下跌，令國泰減少營運成本，而美國經濟好，將會令國泰客運同貨運都會好轉，尤其貨運嘅推動會更大，因為美國對入口需求上升。」張耀昌認為，以現時國泰約十四元的水平，估值非常吸引，相信下半年有力升至二十元水平。

市傳聯想正計劃發行美元票據，部署收購夏普（ Sharp）的南京分公司，以及和 Sharp合作推出智能電視，擴大市場。（《蘋果日報》圖片） 

黃國英﹕恒指變 A股

「大快活規模唔及大家樂，但同時又無其他快餐店可以威脅到佢，可以好舒服咁做『老二』，好穩陣。」黃國英說。（廖健昌攝） 

面對波動的大市，豐盛金融資產管理董事黃國英慨嘆：「民不聊生喇，香港股市愈來愈似 A股，跌就跌得勁，但係又唔會跟外圍升。」他表示，香港政府出招打擊樓市前，港股由地產股帶動，但現在地產股的表現特別差。「市場驚美國收水，恒指有機會跌到二萬點。」

大快活夠穩陣

「 A股啲人生存到，我哋應該都得。」黃國英認為，大快活（ 52）在亂市中的抗跌能力較高，雖然租金上升，令飲食業成本上升，但會淘汰小型經營者，令規模較大的公司者得益，行業重新「洗牌」。「講真，依家你叫人開餐廳，鬼有人會同你開咩？所以大品牌如稻香（ 573）、翠華（ 1314）、大家樂（ 341）都會受惠，但佢哋股價太貴，大快活相對落後，而且夠穩陣。」

中國海外揸長線

另外，黃國英亦看好內房板塊。「中國政府調控咗幾年，大陸樓價同成交都無乜跌。近年內地人工飛升，買樓能力愈來愈高，內房股可以受惠。」內房股中，首選中國海外（ 688），他解釋：「佢嘅規模較大，而且管理得好，以佢系內另一公司中國建築（ 3311）為例，係一個 asset-light business model（輕量資產經營模式），主要靠人力資源帶來收益，做得好好。」他補充，中國海外主要集中發展一線城市，議價力較高，做到貨如輪轉。「相比其他三、四線城市的內房，去貨風險會好高，起咗樓都未必有人買。」

今年六月初，中國海外以四十五億四千萬港元，成功投得啟德兩幅港人港地的地皮。（關永浩攝） 

可考慮美股迪士尼

迪士尼近年投資多部人氣電影，票房均報捷，令集團扭虧為盈，第二季盈利大升三成二。圖為電影《 Iron Man》的主角羅拔唐尼等到紐交所敲鐘。（《美聯社》圖片） 

香港股市交投量不算高，如對港股「失興趣」，黃國英建議投資者不妨轉戰成交較旺的美股，他亦已在美股市場加碼。「我睇好迪士尼（ DIS），佢哋依家唔淨係 target啲細路，而係大細路，好似電影《 Iron Man》，好收得，而且中國人好鍾意入戲院睇戲，另外套《復仇者聯盟》仲拍埋劇﹗真係汁都撈埋，做得幾好。」

彭偉新﹕港股唔算貴

彭偉新認為，中國政府要靠內地房地產「頂住」經濟，故即使經濟差，政府有機會鬆綁，內房反而受惠。（關永浩攝） 

京華山一研究部主管彭偉新同樣看淡大市：「中國經濟轉緊型，經濟增長唔會太多，雖然美國經濟好咗，但啲人又驚會退市收水，令股市無力上升，估計會喺二萬一千點至二萬四千點上落。」他表示，現時香港估值不貴，大部分資金已由大型藍壽股，流入二、三線股票，「好似搖搖板咁，大股跌嘅時候，又會有部分細股升上來，所以就咁睇大市表現無乜意思。」他估計，下半年情況持續，「雖然大市跌，但總會揀到會升嘅股票。」

內房夠硬淨

大市無運行，但曾於多家投資公司擔任董事的京華山一研究部主管彭偉新認為，中國經濟放緩，中央政府反而不會再大力打壓內地房地產市場，甚至可能會推出政策支持，令該板塊會受惠。「之前推出國五條後，內房都係好硬淨，雖然未來半年唔會好似一一、一二年升得咁快，但會相對穩定。」當中，彭偉新最睇好五礦建設（ 230），他解釋：「母公司五礦集團手上土儲高達七百五十萬平方米，仲多過五礦建設本身擁有嘅土儲，未來幾年將注入五礦建設，估計最快今年年底再進行資產注入，未來好有潛力。」他表示，五礦建設的股價相對其他內房股，如中國海外（ 688）的走勢較落後，市盈率只有約十三倍，估值仍低，全年升幅可以超過二成五。
另外，彭偉新亦看好新能源板塊內的天然氣：「太陽能產能過剩嘅問題已經好嚴重，反而天然氣仍有增長空間。」他指，中國仍需要由哈薩克等地方輸入天然氣，滿足需求。「內地十二五計劃入面，要求中國於二○一五年嘅天然氣增長，達到一一年的一倍半，有政策護航，保證咗天然氣嘅發展。當中以安東油田（ 3337）業績最突出，成功拎咗唔少合約。」他估計，下半年安東油田的股價，可由現時約五元四角，升至七元五角。

受惠於國策，市場睇好天然氣相關股份，主要發展油氣田開發技術的安東油田股價受支持，年初至今已大升三成六。（《新華社》圖片） 

跟足 13年　 1蚊變 19蚊