探熱針
𢱑贊助 無綫焗港姐做伴遊
香港小姐質素每況愈下，影響收視亦要陪葬插水。連續二十七年贊助外景拍攝的康泰旅行社，眼見宣傳效果大不如前，一度放棄，拒絕無綫再合作今屆港姐。
唔想失去大水喉，無綫度出絕世「屎橋」，安排應屆港姐分批去八個地方拍外景，另一邊廂，旅行社則推出「 2013香港小姐外景拍攝追蹤系列與你同行•暢遊世界八大名城」計劃，安排團友貼身追訪港姐做賣點，康泰才回心轉意，繼續科水。準港姐變相做免費伴遊，無綫非戲劇製作總監余詠珊，居功不小。
「栢芝奶媽」林芷嘉（右）是今屆港姐較有睇頭的一個，但 facebook豪放照任睇唔嬲，隨時成為她入圍的絆腳石。 
劉溫馨第一輪面試飛釘示人，獲傳媒起朵「飛釘千雪」，有指她認識無綫高層，是內定三甲人選。
宣傳失效
天價報團費
負責統籌港姐的高層余詠珊臨危受命，終於度出一條雙贏橋。她提出將應屆港姐分批前往八個地方，包括巴黎、伊斯坦堡、希臘、首爾、曼谷、台北、北京和潮汕拍外景，而旅行社則推出「 2013香港小姐外景拍攝追蹤系列與你同行•暢遊世界八大名城」的旅行團，讓團友貼身追訪港姐拍外景，當中包括泳衣環節的過程。
即使港姐美貌與智慧有限，卻可以近距離觀摩水著，唯巴黎六日港姐伴遊團，索價$20,999，比起平日十二天巴黎遊只需$19,499，時間短、價錢貴一大截。據了解，旅行社為了慳得一蚊得一蚊，已取消贊助傳媒隨隊拍攝，就連大會梳化服機票酒店錢，都在拉鋸中。
至於一班即將淪為伴遊的準港姐，旅行社方面特別註明，團友不可同港姐有任何身體接觸和言語冒犯等字眼，保障佳麗安全功夫是否足夠成疑，祝眾候選佳麗安好！
天價伴遊團現已接受報名，另一邊廂，週一（六月十七日）港姐進行到第二輪面試，豬扒、騎呢不計其數，有「栢芝奶媽」之稱的林芷嘉以四吋事業線搶風頭，「黑色乳牛」阿 Tam撐住巨胸現身，「港版小雪」同「龍躉嘉欣」在芸芸參賽者中，樣貌同身材只屬一般，由佢哋做天價旅行團伴遊，號召力有限。
港姐外景伴遊團現已接受報名，講到明有傳媒隨隊，食飯時間會隨拍攝進度作出更改，一句講晒，食無定時。 
港姐統籌余詠珊（右三）度出港姐伴遊，氹掂康泰繼續揼水贊助。 
每年港姐外景，康泰老闆黃士心例必撐場。（《忽然 1周》圖片）
廿年前港姐外景，嘉賓粒粒巨星， 91年瑞士外景就有四大天王的黎明同郭富城坐鎮。 
龍躉嘉欣是今屆較有水準的候選人，隨時入圍淪為免費伴遊。 
Jeana（何佩瑜） 10年曾與師姐周秀娜等人組團到德慶盤龍峽，同行團友全部龍友，由朝俾人圍實狂影。
「朱義盛」后冠
過去十多年，無綫有六福珠寶贊助港姐珠寶首飾，但原來未有贊助前，港姐頭上的 bling bling后冠，通通都係「朱義盛」， 87年港姐冠軍楊寶玲，便踢爆后冠全部假石，經多年氧化後，已經走晒樣。
留言列表
