娛頭
淪落廖碧兒 霉溝大陸仔
在法國圓婚返港後,新郎陳豪默認老婆陳茵媺有喜,被幸福由頭冚到落腳的他,肉麻到公開承諾將所有嘢俾晒老婆,甚至當眾高呼:「 She is my queen!」一時間,筍盤進階成為全港最幸福男人!
至於分屬陳豪舊愛的廖碧兒,當年因為拜金劈腿,變相親手造就了陳豪、陳茵媺這對佳偶,如今人財形象三失,更被指腳頭唔好,跟她分手的男人,個個有更好下場。被放逐到大陸搵食的廖碧兒,港男唔敢埋身,淪落到溝國產同胞。
換錯「豪宅」
廖碧兒持有陳豪這個筍盤長達六年,直至一○年遇上富二代林忠豪,以為釣到金龜,竟然一腳踏兩船,背住陳豪偷食。事件張揚後,一心嫁入豪門的廖碧兒,索性飛甩陳豪,點知有眼無珠,落錯注將縮水樓當豪宅,發現林忠豪是空心老倌,屋企無錢過手的失匙夾萬後,廖碧兒即時斬纜。
廖碧兒一個極錯決定,造就了陳豪陳茵媺這對天作之合,雙囍臨門獲全港祝福,誤「作媒」的拜金女,一時間,人又無錢又無,連形象都輸埋,過去兩年多,一跌不起,只好返大陸搵食,即使淪為大配角,亦逆來順受。
根據往績,同廖碧兒分手後的男人,個個幸福有好下場,令她被認定為腳頭差,自從跟林忠豪分手後,香港男人唔敢「高攀」之餘,拜金廖碧兒無人吼,只好將溝仔陣地同事業一齊轉移到內地。
陳茵媺在微博宣布婚訊當日,廖碧兒都有留言恭喜。
落簾開餐廖碧兒同大隻男在餐廳食飯,都好神秘要落簾進行。
鬼祟開餐
最近廖碧兒在橫店拍攝電視劇《吉祥天寶》,同劇演員有元華及王喜,二人均不是拜金女杯茶,廖碧兒冇嘢好揀,向一名幕後肌肉男埋手。
陳豪巴黎圓婚外揚前一個星期(六月五日),人在橫店的廖碧兒傍晚收工,換過便服後,由劇組車送到當地的「胖子火鍋」,同行還有她貼身女助手,二人選擇坐在餐廳最隱蔽角落卡位,其間廖碧兒未停過發短訊,約十分鐘後,大隻男便出現,一入到餐廳,完全唔使周圍搵,對方已知道廖碧兒坐在什麼位置。
大隻男一坐低,廖碧兒即時吩咐餐廳職員將布簾拉低,將原本隱蔽卡位變成包廂,記者從半透明布簾望到內裡情況,大隻男負責點菜,又不時問廖碧兒有什麼想食。兩人用普通話對話,由於廖碧兒普通話非常半桶水,聽唔明或唔識講的,便由助手做翻譯。雖然有點雞同鴨講,但兩人傾得十分投契,廖碧兒更不時做出冧笑嘟嘴表情,狂向大隻男放電。
雨遊巴黎結婚之後一日,陳氏伉儷留在巴黎 shopping。
巴黎落住毛毛雨,陳豪除咗幫老婆遮風擋雨外,更攬到實怕大肚婆跣親。
分頭返房
撐枱腳兩小時,埋單二百幾蚊,大隻男負責請客。離開火鍋店時,廖碧兒再度提高警覺,一出門口便四圍望,更與原本一齊行的大隻男保持距離,她與助手上劇組車,大隻男則步行十分鐘,分頭返回國貿酒店。兩人同住酒店十二樓,卻刻意唔一齊同車,玩前後腳。
陪食的大隻男年約三十多歲,雖然高大,但打扮相當國產,運動服加背囊,甚至將外套綁在腰間,身上所穿的白色 V領 T恤,遠睇以為是 CK( Calvin Klein),近睇原來係 GK( Galvin Kelin)扮 CK,混水摸魚,完全無法想像,釣金龜為人生目標的廖碧兒,會如此淪落。
廖碧兒掉低大隻男,自己坐車返酒店,而大隻男就要步行十分鐘。
返到酒店,兩人同住在十二樓。
帶旺前度
近日被網民揶揄專「帶旺前度」的廖碧兒,個個跟她分手後,都搵到更好的另一半,當中包括劉愷威、林忠豪、陳豪,全部活得比她好!
劉愷威(旺旺)
陳豪(旺旺旺)
林忠豪(旺旺)
扮失憶
曾經風光的廖碧兒,經歷拜金失敗教訓,三十四歲賣剩蔗,檔次直插,霉到溝大陸仔,星期二(十八日),廖碧兒現身有線活動時,有關大隻男新歡,死口唔認。
壹:記者
廖:廖碧兒
壹:有網民笑你,啲男人一同你分手,就有好結果!
廖:我唔知,冇為意,亦都唔會唔開心。
壹:會唔會覺得錯過咗陳豪呢個筍盤?
廖:唔覺得,大家都唔同步,最緊要搵到啱嘅人。
壹:依家擇偶條件係點?
廖:最好高過我少少,鍾意小朋友同狗仔啦!
壹:使唔使有錢?
廖:唔使喎,真係唔使!
壹:最近有冇拍拖?
廖:不斷都有正常咁識男仔,我要留番最好嘅自己俾真正嘅另一半。
壹:我哋影到你喺橫店同個大隻男撐枱腳,佢係你新男友?
廖:(原本笑容滿面,突然變到口窒窒)我哋劇組每日食飯都有四圍枱,你哋影到我咁啱同個男人食飯咋!
壹:嗰日得你哋同個助手,仲拉埋簾喎!
廖:冇呀!係咪套劇個老闆,你哋有冇相俾我睇先,有相我再答你啦!
手繩催姻緣情路唔順的廖碧兒,最近被發現右手戴了三色繩,用來催旺姻緣。
當陳豪公布婚訊後,廖碧兒愁爆,更去了搵盲人按摩,舒緩一下。
開工時,廖碧兒多數與同樣來自香港的元華及王喜食飯。
11年初廖碧兒用母親名買了譽港灣一個六百幾呎單位,但因為收入大減,被迫在 12年 2月賣樓,賬面只微賺 61萬。(《蘋果日報》圖片)
(《蘋果日報》圖片)
當年被廖碧兒嫌棄唔紅又冇錢的劉愷威,近年成為內地當紅小生,更與靚花旦楊冪拍拖,並送她一層三千萬香港半山豪宅。(《蘋果日報》圖片)
拜金冇運行
娛樂圈女星,貪慕虛榮「拜金女」佔唔少,一心想泊好碼頭,最終上錯船,人財兩失搞到變「剩女」的,亦大有人在。
楊思琦
11年,楊思琦單方面宣布與拍拖九年的奀星李泳豪分手,以為成功釣到金龜,點知搭上「空心老倌」吳帥,懷有對方骨肉後才發現新歡欠債纍纍,屢被追債。誕下女兒後,楊思琦即與吳帥劃清界線,獨力撫養女兒。
葉翠翠
08年暗交內地富商黃有龍,並在對方「科水」下連買兩個賽西湖單位,其時葉翠翠死撐是炒股賺錢,被嘲「港姐股神」。後來黃有龍搭上趙薇,人財兩失的她更被追討千萬掟煲費。
陳法蓉
08年,陳法蓉撬陸詩韻牆腳,搭上有「油王」之稱的朱明,拍拖一年後,才發現對方原來在九七年金融風暴中欠下六千多萬巨債,有指甩拖後的陳法蓉大受打擊。
陸詩韻
風雨同路
前度廖碧兒「愈食愈差」,甩難陳豪則幸福滿瀉!同旺夫陳茵媺結婚後第二日,兩公婆拍拖遊巴黎,由於當日落住微微細雨,陳豪一手擔遮,一隻手攬實有咗三個月的老婆,細心又浪漫。返到香港,陳豪公開晒幸福,分享喜悅心情,提到老婆旺夫,他更不怕肉麻笑說:「 Thank you, thank you!真係好多謝佢,由我認識佢開始,身邊一直有好多開心嘢發生,我相信嚟緊有更加開心嘅事。」問到以後是否將所有(身家)俾晒 Aimee?陳豪堅定表示:「一定! She is my queen!」
不過當講到舊愛廖碧兒在微博祝福他時,陳豪即收起笑容說:「 Thank you,多謝晒!」再問他有網民指與廖碧兒分手的男性,都有更好發展,陳豪一貫好好先生作風:「我冇睇呢啲嘢好耐,我依家好好,希望身邊人、朋友都開開心心。」(身邊人包括廖碧兒?)他即笑言:「你哋(指記者)唔好裝我啦!」
結婚兩日就要小別,陳豪返港工作,陳茵媺返多倫多養胎,臨上機前,陳豪在巴黎機場拖到老婆實一實。
返到香港,陳豪向記者展示婚戒,並默認老婆有喜。
從後護
唔願放手陳茵媺懷有豪 B三個月,所以每行一步陳豪都會小心護住。
陳豪滿足老婆夢想,使了三百萬在巴黎凡爾賽宮內舉行婚禮。
週二,廖碧兒出席活動時,首度回應陳豪結婚一事,她表示公開祝福已經足夠,唔會再私下聯絡。
豪媽 Like爆新抱
之前有指豪媽唔鍾意陳豪舊愛廖碧兒有公主病,但她卻對陳茵媺讚不絕口。
壹:滿唔滿意今次婚禮安排?
媽: Super滿意。
壹:新抱咁靚女,係咪好滿意?
媽:唔係因為靚女,靚唔靚好閒啫,最主要係佢好乖,心地又好,同阿 Mo性格好似,都係咁好人。
壹:幾時抱孫呀?
媽:(大笑)我唔知喎,你知唔知呀!(陳豪在旁狂笑)
留言列表