單人訪
蔗渣價錢燒鵝味道 鄒凱光
睇開足球的觀眾一定聽過評述員黃興桂經典金句：「蔗渣嘅價錢，踢出燒鵝嘅味道。」今天看見鄒凱光，我立刻想起這句說話。
近年難得的喜劇演員，每逢鄒凱光出場，例必是笑位。在電台講男講女也字字珠璣，他有份主持的《一八七二遊花園》，一直是商台欲罷不能的皇牌節目。他的實際身價多少我們無從得知，但效果應該能媲美燒鵝無異了。
「我應該連蔗渣價錢都未到。」
他很謙，但後面那句嘛，倒沒有抗拒的意思。有些事，係型就應該認，彆彆扭扭的反而矯情。鄒凱光開 show在即，也是打正旗號大講男女關係，以親身經歷撥亂反正。
「一段關係無論三個鐘定三個月，最重要係完咗之後大家有冇學到嘢？如有進步，你就係好情人，我會專業地令大家進步。」
他的宗旨是救得一件得一件，香港地，的確需要這樣的正能量。
街頭智慧
「我的成長對我影響很大，小時候已知道，跟人硬拼一定死梗，我會想辦法用橋贏你。」
鄒凱光在葵涌荔景邨長大，父親是船員，一年也未必見到一次。沒有嚴父管束，他自小已自由奔放，因此滿腦子街頭智慧。
「屋邨一定有好多飛仔，如何不被人恰同時又不用跟『大佬』？我拿吃剩半盒的西餅請他們吃，他們最初會說：『咩呀，當我哋乞兒呀……又幾好食喎，你老 X吖！』這樣就 friend了。經常被人踢入會，我就扮蠢，入會要唸詩，我常說沒記性唸不來，久而久之他們就說：『條友冇用呀，唸詩都唔識，咪鬼要佢啦！』這樣又逃過了。」
他天生高頭大馬，有時雖無過犯，已是眾矢之的。
「我夠高，打我才能『響朵』，還要專挑我的眼鏡來打，打爛才算贏。我的解決方法是找個比我更高的同學做朋友，把他引入我那個圈子內。我是從不還手的，還手便跟那幫人同一層次。這一刻輸無所謂，因為我深信日後一定可以贏你。」
母親很愛錫他，既會擔心這孩子，也會讓他往外闖。
「媽媽越不管，反而越懂得珍惜，因為我知道萬一行差踏錯，便不能再有自由了。我一直離晒大譜地過循規蹈矩的生活，我不希望媽媽有天去差館保釋我，咁樣好唔型！」
從小到大字典裏只有一個「型」字，其他同伴踢波踩 roller，他揀看電影。開口埋口「杜魯福」，感覺超型！
「最初真是貪有型才去看電影，後來真的愛上了！」
誰是最後勝利
他愛看午夜場，完場後總與朋友們吹水討論，朋友見他喜歡改對白，就提議他不如當編劇。
「真是『叮』一聲一言驚醒。那年代做編劇要大學畢業，我沒有這方面學歷，輾轉入了無綫。本來想去道具部，但他們見我奀挑鬼命，一定不夠氣力擔擔抬抬，結果去了燈光組，也是因為貪我夠高。」
89年亞視改組，需要大量新血，鄒凱光考了進去當編劇，恩師是著名編劇陳翹英和導演馬偉豪。馬偉豪後來拍的《百份百感覺》、《初戀無限 Touch》等，鄒凱光更有份客串。
「 89至 97年這幾年，是一生人中最快樂的。自己是白紙一張，無包袱、無壓力，市道又好，日日就在片場裏過。好幾年生日朋友想請食飯，我說：『要開工唔得閒』，都真係幾型！」
性格主宰命運，凡事要「型」的鄒凱光，最終入了他覺得最「型」的電影行業。幾年後在片場重遇當年有份在屋邨「兇」他的黑社會小嘍囉，對方是場記，而他已是導演了。
「他連正眼都不敢望我呀！所以話，一時三刻的輸不重要，最重要是誰才是最後贏那個？」
96年《百份百感覺》大收二千萬，有份編劇的鄒凱光應記一功。 
與吳君如和杜汶澤主持電台節目《嘩嘩嘩打到嚟》，是為 DJ第一步。 
最初出場必定捱打，後期角色或多或少已有功能。《低俗喜劇》中的導演「黑仔達」，其實笑中有淚。 
「 Da me smoke」這一幕，真是笑到標眼淚。
放大缺陷
當年的街頭智慧，鄒凱光一直稱職地演繹着。他知道，在不同崗位，就要有不同的角色扮演。在家，他是 Matt Chow；在片場，他是鄒凱光；在電台，他是灘叔（來自花名鄒海灘）。
「好多人說我『散』，又做編劇又拍戲又做電台，也有人叫我快點定位。其實不定位也是一種定位，王家衞便說過，當你把自己的缺陷放到最大，那便是你的風格。聽不明的人會話：『唓，阿 Q啫！』但其實這正是我做人的動力。」
作為編劇，他寫過《一個字頭的誕生》、《朱麗葉與梁山伯》、《爆裂刑警》、《金雞》、《三更》、《狗咬狗》等；作為導演，他拍過《男歌女唱》、《身驕肉貴》等；作為演員，他演過（或客串過）超過四十部電影，最初一出場便被人打，近期的《飛虎出征》，已是擔正的男主角。
「做編劇真係搵唔到食，誤打誤撞做了演員，又給我殺出一條血路。那天彭浩翔跟我說：『鄒凱光，你唔係明星，唔係演員，但你已經係幕前㗎喇！』都開心嘅，正如王晶早前話我『靚仔咗喎』，因為我之前太樣衰嘛！我起點低，少少進步大家都好覺眼。點都好，做人最緊要有進步。」
起點低，又沒有底線，有時便換來神來之筆。大家對《志明與春嬌》應該不會陌生了吧？當中鄒凱光飾演的衞生督察絕對是亮點。
「衞生督察這角色是目前為止最喜歡的，因為整場戲完全是我創作的。劇本只寫『用不同語言解決困境』，我就把它變成『 da me smoke』（不准吸煙，日語）之後行街，好多人走來同我講：『你條 X樣， da me smoke，真係好 X好笑！』很多導演喜歡用我都是貪我會忍唔住自行創作，明白嘅，難道貪我靚仔？」
未上畫新戲《飛虎出征》灘叔（左）是男主角之一，升呢之作呀！ 
人生第一個 talk show，反應超乎想像熱烈。
教育港女渣男
貪他靚仔的也不少，他在電台那個身份「灘叔」，便是很多少女，甚至中女的明燈。很多人一面被罵得狗血淋頭，仍一面做忠實 fans。
「有時都會問自己，四十幾歲人為何要幫個十六歲𡃁妹解決愛情問題？人家就是貪你經驗老到，我這年紀能夠贏到𡃁仔的，也只有人生閱歷。」
電台節目的成功，引伸至六月的三場個人 talk show，大談兩性相處，絕對是港女福音。
「在我字典裏『港女』從來沒有存在過，只是『渣男』出現了。女仔天生是應該要遷就的，她們沒有公主病，只是男士有平民病。」
此話怎說？請聽灘叔解釋好了。
「女仔扮到靚一靚出來，你奉承她，她給你開心，這是很正常的交往。只不過近年香港男仔本事有限，而且選擇多了，用四成心思花在東莞女仔身上已得到所有，當然不會再『呵』香港女仔。我向來不喜歡國內文化，因此會花心思在香港女仔身上。」
灘叔所指的，不是盲目地齋呵唔鬧，其實對付港女和渣男的最佳方法，是教育。
「有些女仔只差兩步路都要你揹，你就要講明：『嗱，只此一次㗎咋！』日後她就不會野蠻地說：『初初拍拖時乜都就晒我，依家搞咗人之後又乜都唔得！』男人如果知道自己搞了女朋友之後會變，那就不如早些變定先。一段關係無論是三小時或三個月，最重要是分手後大家有沒有進步？若有進步，那便是好情人。」
鄒凱光今年四十四歲，真正令他動情的女仔，他說一隻手掌數得晒。至今依然抱獨身主義，女性朋友嘛，則數以打計。
「其實是我太了解自己，盡量不容許自己有牽腸掛肚的情緒。如果我一旦愛上一個女仔，我會癲㗎，甚至比一個港女更瘋狂，你不聽我電話，我兩分鐘可以留幾百個 missed call。當然是曾經被 hurt過，才會有今日的想法，現在經常『懶唔志在』，是因為開了那個自我保護制式。我一生求型，假如為等一個女仔電話等到失魂落魄，那種低能真係好唔型。」
他的女性朋友們，都清楚遊戲規則。
「試過同個女仔去了幾次街之後問：『咁我哋依家即係點呀？』我答：『返去諗諗先再覆你！』之後就不會再聯絡了。她要的我給不到，就無謂給人家希望了。每當對方想進一步發展，我就會拉手掣。現在有一班固定的女性朋友，每逢一頭半個月見一次，大家講下笑吹下水，這樣的相處最舒服。最愛是誰？有，我阿媽。我永遠都說阿媽是我心目中 No. 1，便無人異議。」
China Holiday
鄒凱光還有另一重身份，就是標準球迷。他自喻為重量級大後備，一係唔落場，一落場就入波那種。
「但最鍾意都係碧咸，佢嗰種逆境求存嘅意志，真係好值得學習。仲有，佢娶個老婆娶得叻呀，成日黑口黑面，碧咸有婚外情我哋都原諒佢啦！」
黑色幽默，也真是嗒落有味。鄒凱光是一個很有趣的人，堅守獨身主義與眾同樂，相信除了他那班女性朋友外，相信無人有異議。
「要獨身，一定要 keep得好，你睇趙世曾，以前溝 Terri Holladay，依家？ China Holiday呀！我當然唔會七十歲依然溝廿歲𡃁妹，但都希望有啲有質素嘅伴侶喺身邊。」
噢，都說廣東道已聽不見廣東話了，三十年後的香港會否變成一街 China Holiday？灘叔，祝你好運呀！
下期預告
撰文：林蕾
攝影：陳偉強
協力：李梓軒
錄像：湯文峯、盧芷斌
化妝： Yen Lai
髮型： Arthur Poon@Salon Core by IL Colpo
眼鏡： Visual Culture Optical
形象： Bryan@the Flaming
服裝： agnès b
留言列表
