今年 26歲的迪倫，最大的夢想是可以在全世界都開到分店。 

創業通

死位開 cafe　旅遊主題吸跨區客

牧羊少年•茶•酒館(下稱牧羊少年)以旅遊為主題，即使位處偏僻內街，仍能吸跨區客，飯市座無虛席，連之前開的 3間分店， 26歲的老闆迪倫月賺 25萬。
迪倫專揀別人眼中的「死位」來開 cafe，他認為 cafe位置不好並不是死症，但租金平可以打持久戰，只要能突出賣點，便可吸引客源。

牧羊少年位於太子白楊街，記者只見周圍都是車房，與牧羊少年有點格格不入。這裏佔地 2千多呎，主要以木做裝潢，配以柔和燈光，很有歐陸風情。最正是你走入門口已看到一幅很大的世界地圖，牆身配以英國、加拿大等不同國旗作裝飾，在水吧前還有一個講台，台上靠牆有一個放滿旅遊書的書櫃，只要客人來到，便有一股想去旅行的衝動。
這一切都是由老闆迪倫設計，「店名喺嚟自一本叫《牧羊少年奇幻之旅》嘅書，當中追尋夢想嘅心情好 touch到我，於是用咗嚟做店名。香港人鍾意去旅行，我開牧羊少年諗住可以有個空間畀人計劃旅遊行程，分享去世界各地嘅心得。」
在下午 1時左右，店內已座無虛席，有不少客人慕名來到這「死位」光顧，其中的一名客人阿 Yo說︰「喺網上知道呢間 cafe，覺得布置同旅行主題幾有特色，特登過嚟幫襯，我仲帶埋相機嚟影相㗎。」迪倫說︰「呢度係僻啲，但香港又唔係話好大，只要有賣點，位置唔係太差都吸引到客人。」

兼職開始尋咖啡夢

不要以為年紀輕輕的迪倫只是隨口噏，原來這已是他開的第 4間 cafe，可謂經驗十足。他 16歲讀中學時已在 cafe做兼職，一做便 6年，「細個想好似啲文藝青年咁寫吓文，當時興樓上 cafe，覺得好啱 feel，一放學就去打躉，之後仲喺嗰度做兼職，唔經唔覺做到副學士畢業。」
在 cafe兼職 6年，耳濡目染下學懂了怎樣經營一間咖啡店。 08年副學士畢業後，迪倫與親戚一起創業，「 cafe老闆見我喺度做咗咁耐，叫我幫佢手做全職，仲開到 2萬蚊一個月，對於啱啱畢業嘅我嚟講，真係幾吸引，但屋企人建議不如我自己開，話晒叫自己生意，於是開始咗自己嘅『牧羊少年』之路。」
最初創業時，迪倫選了在一個冷門位置開設 cafe，「同屋企人借咗 8萬蚊，再同姨媽、表姐合資。我住喺葵興，見葵涌中心有個吉鋪，雖然個場係舊，人流並唔多，但近港鐵站，附近有公屋及屋苑，對面馬路又有好多工廠，早餐同午市有一定客源。同埋我喺 cafe學識沖嘅特色飲品，好似水蜜桃花茶、百香果綠茶等，覺得可以吸引到啲客人幫襯。」

牧羊少年咖啡•茶•酒館開設地點附近是車房，與周圍環境格格不入。 

客人 Bobo、 Sharon：有次朋友帶咗嚟幫襯，覺得 cafe個環境同食物都唔錯，𠵱家周不時都會帶啲新朋友過嚟食吓嘢。 

控制租金成功關鍵

第一間 cafe B420於 08年開業，迪倫認為控制成本是創業成功的關鍵，「呢度 2百呎鋪位租金只係$9,500，生意唔好可以請少啲人、入少啲貨，但租金固定咗，慳唔到。姨媽之前做過茶餐廳，最初廚房由佢負責，我就一腳踢做埋樓面、水吧、清潔及埋數等，朝早 6點做到夜晚 12點，返去瞓 3、 4個鐘又開工。頭半年完全冇放過假，聽落好似辛苦，其實過得好充實。」
投資 32萬開設 B420，首月已有數千盈利， 1年便已回本，參照了 B420的經驗，於 10年迪倫投資過百萬在長沙灣福華街開了第二間 cafe秘密花園 1981，「其實呢個位好靜，頭一個月冇咩客人，但我用 2、 3萬可以租到兩層 1,800呎嘅鋪位，租平可以打持久戰。雖然 cafe位處舊樓，隔籬好多車房，但工廠區同屋邨都喺附近，一定會有街坊同上班族經過。加上秘密花園算係豪裝，同埋話就話 cafe，其實我哋提供茶餐廳食物，但配特色飲品，好似常餐配花茶，喺區內都幾突出，可能係咁，只係捱咗個半月，就開始儲到人流同口碑，只係年半已經回本。」

雖然位置較偏僻，但到了中午時分，牧羊少年咖啡•茶•酒館還是有不少客人前來光顧。 

店內有一個放滿旅遊書籍的書櫃，加上一些懷舊的座椅和擺設，營造出特有的氣氛。 

Cappuccino$30為提升質素，迪倫特地去台灣學沖咖啡。

旅遊主題吸跨區客

其後朋友見迪倫成功，便與他於鰂魚涌的鰂魚涌街開了第三間 cafe Dandy House。 B420、秘密花園 1981與 Dandy House位處均較偏僻，主要是熟客生意，但是迪倫一直想開設富有特色主題的 cafe，見太子白楊街有吉鋪， 5萬便可租到 2千呎，便萌起開牧羊少年的念頭，「其實我冇做過宣傳，只係靠客人口碑，但之前 3間 cafe係地方小店，只係做街坊熟客生意，如果我用旅遊做主題，可以吸引其他人跨區嚟幫襯。」

開設了旅遊主題的 cafe後，有團體邀請迪倫出席相關活動，好像 1月時康泰旅行社舉行的黃士心博士旅遊新書發佈會，與馬來西亞旅遊局局長等人合照。 

員工美欣：嚟幫襯嘅客人咩年齡層都有，不時都會同啲客人傾吓偈，覺得喺度做可以接觸到唔同嘅人，而且聽到唔同嘅故事。

除布置外，迪倫都想了不同方法來突出牧羊少年的旅行主題，「我哋有個『自遊講場』，每隔兩個星期日會請旅遊達人嚟舉行講座，分享旅遊所見所聞同心得；『五夜音樂』係邀請唔同嘅音樂人，喺每個月其中一個星期五嚟現場獻唱同旅遊有關嘅歌或者異國民謠。」迪倫還想到，只要客人拿一本旅遊書來，便可免費換一杯$25以下咖啡，「不論地方，如果係旅遊攻略，年份要 10年之後，我想凝聚到一班客人。」

沙嗲牛肉麵配多士奄列$28原味拿鐵$34 

咖喱雞扒紅米飯配蜜桃紅茶$48 

飛到台灣學沖咖啡

除明確主題外，食物和飲品質素是迪倫能留住客人的重要條件，「如果要跨區客再幫襯你，食物同飲品要求更高，特別係咖啡，開業後我同幾個水吧同事去台灣，向咖啡大師林東源學沖咖啡。」
牧羊少年投資了 180萬，只開了 7個月已有錢賺，月賺近 18萬，依走勢看，估計 10個月已可回本，「前嗰幾間店 7成客人都係 OL為主，而牧羊少年就咩類型嘅客人都有，外國遊客、學生、一家大細、甚至公公婆婆都會嚟食吓嘢。」
說到將來的發展迪倫充滿了幹勁，希望可以將生意繼續發展至全世界，「我係定唔到落嚟嘅人，要不斷去搵目標去完成，等呢度發展穩定咗，就繼續開新嘅分店，牧羊少年係最貼近我理想中嘅 cafe，以佢為藍本，希望可以喺唔同地方發展，𠵱家去上海睇鋪，睇吓有冇發展機會。」

秘密花園 1981的裝潢也經迪倫精心布置，十分有特色，吸引在附近工作和居住的人光顧。 

秘密花園 1981開設的地點附近是車房和唐樓，但迪倫還是把他經營得有聲有色。 

開業成本（葵興店）
租金︰$28,500（ 2按 1上）
裝修︰約$140,000
設備及雜項︰$150,000
總投資︰約$318,500

每月收支
租金︰$100,000
人工︰$800,000（ 70人）
入貨︰約$600,000
雜項︰$150,000
營業額︰約$1,900,000

盈利︰約$250,000
以 4間 cafe計算

學沖咖啡

在 cafe兼職了 6年的迪倫，把特色飲品運用在店上，吸引客人光顧。 

要學沖咖啡或特色飲料，除了要遠赴台灣，其實香港都可以學，迪倫說︰「畀員工學多啲嘢，可提高員工嘅質素外，仲會令員工對公司有更多歸屬感。」

酒吧咖啡屋營運之飲料管理入門
機構︰香港工會聯合會業餘進修中心
時間︰ 18小時
內容︰講解酒吧，咖啡店鋪的牌照申辦程序、生意營運及餐飲料理，例如葡萄酒、威士忌、雞尾酒、啤酒及各類酒品的品嘗方法，如何調製咖啡、紅茶、綠茶及各種冰調飲料。
費用︰$510
查詢︰ 2712 9165

撰文：曾志恒
攝影：彭自維、黃家活
部分圖片由被訪者提供