今年 31歲、現職為基金產品公司高級業務產品經理的 Martin，雖然只放假回老店幫手，但採訪當日見他與十多位師傅一起在廚房內造包，功架絕不輸蝕，「其實整包都幾考工夫㗎，由於每次溫度同濕度都有偏差，所以麵粉發酵嘅時間都有唔同，少啲經驗都唔得。」

Jobs Live

平安包的故事

太平清醮剛於 5月 17日舉行，吸引近 3.5萬遊客來長洲，為看飄色巡遊和搶包山活動，但講到手信，點會唔買番一個平安包？由長洲碼頭附近的商店，到內街的餅店都有賣平安包，要數平安包老字號必定是有近 40年歷史的郭錦記。今年第二代 Martin一如過往幾年，請假回來幫手造包，他更有意接棒，希望將老店傳承下去。

遊客周先生、鄧小姐行咗成個長洲，見到呢間條人龍特別長，覺得呢間應該係最出名，我哋嚟排隊買番 2盒。

為了準備太平清醮這個一年一度的大節日，老闆郭先生請來十多位整包師傅，分兩更來趕工，讓客人可以買到新鮮出爐的平安包，「呢幾日好多客人同我哋訂包，加上散客，我哋喺太平清醮前 3日開始通宵趕工，如果唔係就唔夠包應市。」

第二代接棒

平安包不僅是郭錦記的招牌貨，也是見證兩代傳承的故事。每逢這個大節日，為減輕老父的負擔，作為四仔的 Martin和弟弟及 2位家姐特地回來幫手，「見阿爸整包咁辛苦，有時仲做到手抽筋，好想幫輕阿爸，嚟緊會接手間鋪，但會等個女大個啲先，𠵱家希望學到幾多得幾多。」

今年平安包售價調整至每個$8，比之前一年加了$1，但客人絕不介意，太平清醮當日早上 7時開鋪，已有過百位客人排隊買包，至凌晨 4時才收工。總結這三天的成績，已賣出約 3萬個平安包。臉帶疲累的 Martin，終於功成身退。

7:00am店鋪一開，郭錦記已圍滿買包客人。

在長洲的各大賣平安包的餅店中，以郭錦記的人龍最長，為了保持秩序，老闆要特別用鐵馬把人流和隊伍分隔。

10:00am郭老闆是 Martin的父親，做事喜歡親力親為之餘亦非常講求人情味，他特地走到人龍派發電筒紀念品給客人。

1:00pm整包之餘，見客人太多， Martin也會走到店面幫手賣包。

1:30pm-3:00pm辛勞了半天，到了飄色巡遊時，因為封路，大家終於可以休息一下。 Martin則把握時間，帶女兒和姪仔出來看表演。

8:00pm即使入夜，郭錦記仍然客人不絕。