外太空

畢彼特　喪屍雄風

有理由相信，畢彼特（ Brad Pitt）旺妻。自從 05年撻着安芝蓮娜祖莉（ Angelina Jolie），史密妻做埋導演做埋政客，切割雙乳事件成為人民英雄，將來選總統都有可能。
史密夫呢？這些年來，兩度爭奧斯卡影帝敗北，反而拍《生命樹》（ The Tree of Life）又捧紅了拍檔 Jessica Chastain，演來演去文藝片也好像替人高興，終於拍番商業片，自己做老闆，找來《新鐵金剛之量子殺機》（ Quantum of Solace）的導演 Marc Forster打造喪屍片《地球末日戰》（ World War Z）。
不用怕，畢彼特今次扮演聯合國調查員，肯定不似成名作《 12猴子》（ Twelve Monkeys）要扮癲佬，或者似 Dior香水廣告俾人扮癲佬。

爭版權

畢彼特好紅，但由始至終都偏愛接拍文藝作品，商業動作片？數到最近已經要去到 05年的《史密夫決戰史密妻》（ Mr and Mrs. Smith）。
事隔八年，肯主演《地球末日戰》，咪話唔出奇。改編同名小說，爭贏里安納度狄卡比奧（ Leonardo DiCaprio）至取得拍攝權。畢彼特專揀出名導演合作，高安兄弟（ Coen Brothers）、昆頓塔倫天奴（ Quentin Tarantino）、 Terrence Malick，全部鼎鼎大名。最新合作單位 Marc Forster雖然曾經拍《孽愛傷痕》（ Monster's Ball）令 Halle Berry做影后，但計級數，係爭咗一截。
但睇佢之前有份改造 007成文藝小生，加埋愛文藝的畢彼特自己有份做監製，你都唔使旨意《地球末日戰》真係會純粹打打殺殺。畢彼特畢竟不是湯告魯斯（ Tom Cruise）。

電影以美國作背景，但拍攝地點多在英國與蘇格蘭，然後扮番美國，成本高達兩億美元。 

光頭的導演曾經拍過《追風箏的孩子》，拍《量子殺機》在票房上也算成功，但都幾明顯老闆畢彼特至係話事人。 

為打入中國市場，據聞電影又有啲改動。再製成遊戲版本，跟《生化危機》調轉。

救世軍

睇劇情，又唔係唔正路喎。
好簡單，恐怖病毒襲地球，賴咗嘢，會死，死完立刻變喪屍，轉頭再襲擊未死的人類。前聯合國調查員畢彼特帶住老婆仔女著草，走甩咗，入番去，搵救命藥物。
睇預告片，其實同外星人、哥斯拉、隕石等等災難片，分別不大。跟《生化危機》系列的分別，反而大，因為，《地球末日戰》發生在當下，唔係未來一片黑暗無乜人氣的世界。
打起上嚟過癮得多。

大製作，喪屍也以量取勝，外國傳媒以喪屍海來形容。 

畢彼特扮好老公好老豆，符合形象，但做影帝心願，看來要靠年底上畫的《色辱》導演新作《 Twelve Years a Slave》。 

麥迪文剃頭打有錢佬

講開喪屍片，唔計玩另類嘅愛情片《熱血喪男》（ Warm Bodies），近年，比較好睇嘅應該係南非片《 D-9異形禁區》（ District 9）。
導演 Neill Blomkamp一舉成名，火速加入荷李活接拍大製作《 Elysium》，今次唔玩喪屍，但《 D-9異形禁區》狂拍南非貧民區惡劣環境，去到荷李活照舊。《 Elysium》講 2154年，地球已半死，窮人等死，有錢人自造一個極樂世界，無饑荒無疾病無戰爭，剃頭演出的麥迪文（ Matt Damon）有病在身，諗住上去搵人打救，班有錢人當然睬你都傻。
嚟到香港播，可能會成為小股東帶去開會的精神食糧。

麥迪文剃光頭後，個樣完全唔同咗。拍完《叛諜追擊》後，曾經話過自己再跑唔郁，轉個頭，拎支重型武器出來。 

導演前作《 D-9異形禁區》刀仔鋸大樹，曾經提名過奧斯卡最佳改編劇本，上位後，製作成本立即增強到一億美金。 

茱迪科士打竟然接拍呢齣科幻片，我懷疑研討貧富關係的部分，比重會比科幻片元素更多。

撰文：方俊傑