Rosemary第二次跑馬拉松，便參加長城馬拉松，雖花了七小時零八分才跑畢全程，但她坦言志在參與。
今期流行
究極馬拉松
Rosemary挑戰長城
近年熱衷運動的名模 Rosemary，二月在港首次參加馬拉松半馬賽事，一跑上癮，本月十八日她和中印籍富商男友 Jason，一齊參加被譽為「五大冒險馬拉松」之一的北京長城馬拉松，最終兩人以七小時一齊衝線， Rosemary解釋說：「原本預計四小時可以完成，但因賽前兩日 Jason膝頭有事，唔想佢再整親，所以陪佢慢慢跑。」
兩人參加全馬的四十二公里賽道，要經過五千級階梯、柏油路、小石路和黃土路等，「自己無攀石經驗，有幾段要爬階級，真係好辛苦。」
日期： 5月 18日
賽事：黃崖關長城國際馬拉松
全程： 42公里（全馬）
Rosemary陪住有傷患的男友慢跑，衝線後兩人激動互擁。 
長城賽道上有五千級階梯， Rosemary要又跑又爬才能過關。 
Rosemary獲發大會證書。
戒絕夜場
由於男友愛運動，受他感染，現在 Rosemary約三五知己唔係去夜場飲兩杯，而是一早去行山，「有外籍朋友，唔知香港有咁多靚風景。」
跑馬拉松對 Rosemary來講，唔止運動咁簡單，「覺得自己身心都唔同咗，為練跑我戒了酒五個月，身體和精神都好好， good experience on my life。」至於下一個目標是否和拍拖三年的 Jason結婚？她笑着搖頭說：「只是計劃下年參加敦煌的戈壁馬拉松。」
北京之行除了跑馬拉松，她還留了數天同男友預支蜜月，入住每晚約一萬五千港元，連泳池的套房。 
Rosemary和男友 Jason，到埗首晚，即去品嘗北京地道美食片皮鴨。
黃德斌乾蒸沙漠
遠赴撒哈拉沙漠的黃德斌，挑戰有「地獄馬拉松」之稱的沙漠馬拉松，「唔係跑公路，而是沙路、石路和山丘，唔夠集中好易跌親，跑每一步都好費力。」缺乏經驗，他首日落場跑只套了沙套，跑鞋入滿沙，翌日換了 boot型跑鞋，卻弄傷腳底起泡。
但令他最難忘的不是損腳起泡，而是無涼沖，「在沙漠地區，水係好重要，每人每日只配給 1.2公升水，仲邊有水沖涼？自己帶 BB濕紙巾去抹身。」
在七日六夜賽事中，選手要自行揹睡袋、爐具、日用品和糧食，「選手見到面互相問帶咗幾多卡？原來係卡路里，佢哋計好每日消耗幾多卡路里才帶幾多乾糧，因為七日比賽，行李靠自己攞。」此行他以電視台攝製隊身份參加，所以不算是正式參賽者，「好遺憾，下次都會再跑，但要俾我抖抖先，真係好辛苦。」
日期： 4月 7日至 13日
賽事：撒哈拉沙漠馬拉松
全程： 240公里（七日六夜）
氣溫： 35-50度
黃德斌在撒哈拉沙漠跑馬拉松，要戴眼鏡和口罩，面對風沙和刺眼的陽光；而跑鞋必須套上沙套（圓圖），否則邊跑邊入沙。
沙漠地區溫差大，日間可高達三十五度，各跑手穿上長袖防紫外光衣服。
每晚紮營後，他要動手煮食；至於小解要挖半呎深沙坑來解決，大解則會用可生物分解的膠袋（上圖），解決後會收集處理。
陳貝兒
北極長跑
已經嫁人上岸的有線前主播陳貝兒（ Janis），是首位參加北極馬拉松的亞洲女性。她坐了三十小時、共轉了五程飛機，一到埗即跑，「要克服時差同溫差，跑得快流汗會結霜，跑得慢手腳又會凍到麻痺。」她跑了約十公里，卻因誤踏鬆雪扭傷腳，被駐場醫生勸退，未能完成賽事，她說：「真係好遺憾。」
日期： 4月 9日
賽事：北極馬拉松
全程： 42.195公里（全馬）
氣溫：零下 30度
陳貝兒（上圖）與其他跑手在北極的冰雪上跑馬拉松，在極低溫下，眉毛和眼睫毛上的汗水會結成霜。 
男士可在戶外的木桶小解，女士有專用的小屋，但以儲存方式處理，臭氣熏天。 
素食多年的 Janis和 Green Monday隊友，入住大會安排的營地，每個營可容納十二人。
Janis比其他隊友遲兩日出發，故未能適應環境，一落機便要跑。
臭氣難忘
難得來到北極，當然要體驗當地生活，不過 Janis為了避免去廁所而勒住肚皮，「當地因保護環境，不會用化學劑，營地女廁得一個，其實係用一個筒儲住，入到去勁臭，臭到好難形容，為了少去廁所，自己少飲少食。」
素食已十年的 Janis，站在北緯九十度雪地上，有感而發說：「見到眼前雪景好靚，但我好慚愧，自己多多少少，都有份傷害這片地方。」
留言列表
