周麗淇杭州炒車生死20秒
周麗淇（Niki）昨日乘七人車從杭州前往橫店時，車輛突然爆胎，當時司機呆了半晌忘記煞掣，又揸住軚盤左扭右扭，差點被大貨車撞個正着！幸而有驚冇險，只炒上欄邊，人車安全。面對生死時速二十秒，Niki事後高呼：「執番條命！」
將與林峯合作內地古裝劇《大漢賢后衛子夫》的Niki，昨早由香港乘飛機到杭州，再轉乘七人車前往橫店，準備為新劇定裝，但險車毀人亡！昨早11時，當時Niki座駕駛往橫店途中，因路面凹凸不平，車子突然爆胎，當時坐在後座的Niki睡得正酣，但因司機沒有及時踩Brake，軚盤又左扭右扭，險被大貨車攔腰撞個正着，並炒上欄邊，險象環生，其經理人王敏慧和助手立即叫醒Niki。
公安幫換胎
幸而坐在前座的工作人員及時幫司機扭正軚盤，司機終及時煞掣，化險為夷，但已令Niki嚇到鼻哥窿冇肉。事後記者致電Niki，她表示經歷生死時速二十秒，至下午仍未定驚：「好彩真係執番條命，依家所有人冇事已經要感恩。」她又透過助手表示，當時已立即報警，由於車來車往，眾人不敢落車，可是司機沒有危機意識，居然沒打死火燈，要勞煩Niki及助手打燈。等了兩小時公安終到場，更幫手拆車胎檢驗。為趕時間，Niki最後Call另一輛車前往橫店，事件足足擾攘三粒鐘。
微博報平安
事後Niki在微博寫道：「向大家報平安，我們已經安全到達酒店！準備工作了！謝謝大家關心和一班工作人員援助！」伍詠薇亦擔心Niki的安危，並留言叮囑她小心。
此外，Niki前晚與苗僑偉（三哥）、黃宗澤等為《超級無敵獎門人終極篇》錄影。玩講真心話環節時，眾人被問有否整容？三哥即寸Niki：「乜你唔係整咗？」Niki說：「如果我想整就整個鼻，因為好扁，但冇諗過隆胸，因為唔想太大負擔。」然後又寸番三哥：「三哥你個鼻都好靚，有冇整過？」激到三哥搭不上嘴。
文：專案組
留言列表
