Alan本身為平面設計師，但對攝影有濃厚興趣，並自資出相集，圓出版夢。 

青雲路

自資出書圓作家夢

雖說香港是文化沙漠，但每年一到七月，大量新書推出，書展入場人數達過百萬人次，可見書迷仍會為一年一度的盛事，大破慳囊。同時，熱愛寫作的人也不少，為了一圓作家夢，他們願意投擲數萬元，自資出書，姑勿論能否收回成本，但能夠手握一本屬於自己的書，便已覺值得。

CASE 1：找廠印刷慳成本

Alan　 30歲＋
職業：平面設計師
單看 Alan相集的書名《相片也會呼吸》已覺得很吸引，打開書欣賞，每一張相片的構圖和顏色也很特別，恍如一幅幅油畫般，很有意境，原來他曾獲得國家地理頻道攝影獎，「我好鍾意影相，近年尤其鍾意影貓，一直都夢想可以出相集。」
最初他構思的相集，每張相只會有個標題，但朋友聽罷覺得不吸引，提議他每張相附一段文字，「聽到要寫字就有啲卻步，差啲要擱置出相集嘅計劃，咁啱上年開始有人邀請我出席講座，慢慢儲咗啲講稿，我索性將講稿做成相集內容。」
去年中想好出書， Alan曾投稿到幾間出版社，可惜沒有回音，他便再請教一些曾出相集的前輩，發現坊間有不少出版社會幫作者自資出書，但質素參差，「出相集好講究紙質同印刷，出版社限於收費，未必會做到我嘅心水，加上自己都識排版同 design，只要搵廠印刷同搵發行商已得。」

Alan的相集共印了 1,000本，估計已賣出超過 8成。 

每張相片附上一段文字內容。 

相集中佔一半是貓貓相片。

印刷成本慳逾一半

Alan在藝穗會擺相展，售出近百本相集，不少讀者還找他簽名。 

過印刷這關一點也不易， Alan找了 3間印刷廠，想印 1千本相集，收費由 6至 10萬不等，遠遠超出他預算。幸好後來經朋友介紹，找到一間印刷廠只收$25,000，印刷費慳了超過 5成，「我計過條數，𠵱家每本書成本$25，如果我賣$98，賣 300本已可回本。最初間廠用數碼打稿畀我睇效果，但唔啱我要求，香港間廠得細機，唔係專印相集，佢哋專登帶我返大陸廠，用大機去印，質素真係好好多。」
完成印刷，下一步便是找發行商， Alan主動找「聯合發行」，因其可發書到三聯、商務及中華書局，「不過發行商一般唔會對新晉作家太上心，佢哋就問我攞咗 500本書，約半年就會話番畀我知個銷量，賣剩會退番畀我。」
Alan每賣出一本書，便要跟發行商拆賬，大約是售價的一半，另外還要加$3行政費。另外 500本相集，便經親友及在藝穗會舉辦的相展等售賣，至今已賣出 300多本，早已回本了。「如果自己有門路賣書，唔使經發行商，會賺到最多；但出得書點都想喺書局有得賣，同畀多啲人接觸，所以一定要發行。」

樓上書店都有得賣

相集曾成為書局的暢銷書之一。 

原本 Alan計劃在去年聖誕前出書，可惜卻遇上蝦碌事，「運輸架車壞咗，要遲一日出車，結果趕唔切喺發行商盤點前送到，要喺聖誕後先出到。」雖然半年期未到， Alan未得知相集銷量，但他曾成為商務書局嘅暢銷書之一，估計成績不錯，「發行商話最初派書，每間書局都只要 2、 3本，但後來有朋友喺銅鑼灣嘅大型書局見到有十幾本，應該係之前嗰幾本賣晒，所以再入，之後連大眾書局、樓上書店都陸續有得賣。」
這次出書的成功，令 Alan更有信心，「原本今年想出一本純貓相集，不過我啱啱同朋友組織咗個愛護動物嘅團體，所以會先同朋友一齊出慈善相集，佢影狗、我影貓，一人影一半。」

點搵印刷廠？

相集的印刷質素很重要， Alan便專程回內地廠看打稿。 

可以上網搜尋印刷廠資料，有大量可供選擇，不過未必間間也接細單，故要查詢格價，及最好到印刷廠看樣辦，了解印刷質素， Alan便推介替他印刷相集的印刷廠，資料如下：

Charming Design& Printing（創藝設計印刷）
電話： 2654 7489
電郵： mailto:info@charm-print.com

CASE 2：儲一年錢做作家

洛洛　 23歲
職業：恆商物流系 Yr.3
「我好想將來可以做作家，好想出本書，我呢幾年有寫開網上日記，內容主要係日常生活、旅行等，就想試吓用嚟出第一本書。」今年為大專生的洛洛，自小想成為作家， 11年萌生出書念頭，便上網找尋自資出版社的資料，發現坊間的自資出版社會為作者提供一條龍服務，包括排版、設計封面、校對、找發行商，以印刷 5百本書為例，一般收費 2萬以上。
經一輪格價後，洛洛選中 A&E出版社，「因為佢最平，印 5百本收約$18,000。」
A&E由負責人 Nichole一腳踢，二人相約在 cafe shop見面，談到書本內容和設計後，洛洛便開始 1年的儲錢生涯。
近年許多大學及中學生自資出書，大多由家長打本，令出書變得很容易，不過洛洛卻是例外，她為了出書，打了 3個月暑期工，平日的零用錢又死慳死抵，儲了 1年才圓夢。「我唔想俾屋企人同朋友知，所以自己偷偷哋儲錢，暑假去做 sale，平時零用又儲起佢，慳到唔敢買嘢、食嘢，真係捱得好辛苦。」

洛洛應家人要求修讀物流，但未來最想成為作家。 

每篇散文附有她親自拍攝的相片，圖為台灣旅行。 

書展出書會多人買

儲夠錢，去年洛洛趕在書展前出書， Nichole表示：「書展係一個好機會，因為書商、出版社都會將新書放喺當眼位置，而且嚟書展嘅人都肯花錢買書，賣出嘅機會會高過書局。」
洛洛把網上日誌變為散文集《只是一個回憶而已》，每篇散文附上一張由她親自拍攝的照片，雖然內容太個人化，印刷也十分簡單，但洛洛笑言拿着自己的作品，已激動不已，「其實一路儲錢都有掙扎，驚冇人買，但之後覺得出到本書已經好 ok，賣唔賣到已經冇所謂。」書本印了 500本，現賣出約 100本，雖然成績不算好，但洛洛也很滿足，「之後屋企人同朋友知我出書都有捧場，佢哋話係一個好好嘅經驗。」
洛洛坦言能夠出書，最重要是堅持，「我冇諗過自己可以咁堅持去做一樣嘢，𠵱家更令我將來想再出書，第時好想寫一啲另類題材，如同性戀、家庭暴力等，好希望下年就可以出到第二本書。」

散文集內容輯自洛洛的網上日誌，記載她的生活點滴。 

注意事項

坊間有不少為作者出書的自資出版社，以印刷 500本書、每本約 200頁的小說為例，一般收費超過 2萬，視乎不同的紙質及類型，又有不同收費，如相集、畫集等需要印刷精美，一般要 3萬以上。 A&E出版社負責人 Nichole指近年因為印刷及紙品成本上升，因此他們的收費也調整至 2萬起跳，「好多人想趕書展出書，千祈唔好 5、 6月先去印，因為印刷廠寧願做大單，未必會接細單，所以要預鬆時間，最好 4月前印好，等到 7月先出版。」
自資出書的作者最好有心理準備，大多不會賺到錢，因為需與發行商拆賬，一般發行商要拆佣 45折至 55折，如果本書賣$60，即發行會拆賬$27至$33，扣除 2萬元製作及印刷成本，賣出 500本，作者都要蝕錢，所以大家在出書前，要考慮番個題材及定價等問題。近年市場以工具書，如教炒股、食譜及旅遊等題材會比較受歡迎。

Anything& Everything
出版社： http://www.aehk.net 

撰文：洪芳俠
攝影：傅新發、黎韋邦
部分圖片由被訪者提供