漫遊毒物

XBox One變身聲控機頂盒！

微軟新遊戲主機，上星期三終於現身，機名唔叫 XBox 720，而係還原基本步叫「 XBox One」。上個月 PS4發布會， Sony大賣關子只公開新手掣設計，畀 fans噓到爆，今次微軟好識撈， 8核 U新主機、聲控手掣、新 Kinect感應棒一舉公開，但口痕友就笑稱設計似「 8仔」高清機頂盒。
而事實上， XBox One又真係唔只打機，仲可以上網租看高清電影、買歌聽、 Skype吹水，話唔埋微軟就係想你覺得： XBox One＝新世代高清機頂盒！

XBox One性能簡介
8核心 CPU/ 8GB RAM/藍光碟盤/ 500GB內置硬碟
聲控手掣/配備 Kinect體感裝置/不對應 XBox 360光碟
USB 3.0端子/ 802.11n WiFi/對應 4K畫質
預計 2013年底推出、正式發售日及售價未定
（傳聞約$4,600港元）

叉盒，亞視嚟嘅，馬上轉台！（設計對白） 

學我玩體感聲控，收你版權費！（設計對白） 

8仔機頂盒

變身 Ironman玩體感聲控管家

網上傳過新機叫 720同 infinity，最後叫 One雖有點反高潮，但勝在易記。機體採用 8核 CPU、 500GB內置硬碟、藍光碟盤、行 Windows 8平台、對應 4K畫質，其他性能大抵跟市面的高規格 PC電腦相近，而 Sony fans話睇 spec. PS4強過 XB One 3、 4倍， Sony股價仲喺上星期三升咗少少。最核心變化就係直接配搭 Kinect體感操作器，手掣上仲會有收音咪，整合埋電視功能，可以利用動作同聲控操作開遊戲、轉台、 tune音量，似足 Ironman叫佢個電子管家 Jarvis做嘢，勁寸！
遊戲方面，發布會中公布嘅有《 COD： Ghosts》、《 Battlefield 4》、《刺客 4：黑旗》，玩科幻+推理元素的《 Quantum Break》，仲有車 game《 Forza 5》及 EA幾款運動 game，驚喜不大，似乎一眾遊戲廠，除咗加強畫面，仲未諗到新出路。不過作為機民，以上 title始終要玩， XB One似乎都係必買！

《 COD Ghosts》遊戲畫質其實都跟現時差唔多，不過想一想 360都已經係 10年前機種，換部新機都好正常。 

場內主持叫聲「 Xbox,On」部機就會開動，叫「 game」就打機，聲控真係好寸。 

快過蘋果微軟開台

講番新機個名中的「 One」，微軟話想表達新機唔單只打機，而係玩家客廳中嘅娛樂中心：新增藍光碟機睇電影、通訊軟件、社交網、租片、買歌呢啲都係例牌嘢啦，最大野心係夥拍荷里活片商開頻道，會針對打機宅男口味拍攝劇集賣錢，首作《 HALO》真人版竟然係由史提芬史匹堡監製！
家吓玩手機 app的用家仲多過玩電視遊戲，微軟勇敢轉型，將手上有成 4,600萬個 XBox Live金會員，視為網上娛樂銷售目標，大幅拉近同最大對手 Apple iTunes間嘅距離，絕對係明智之舉。其實 Steve Jobs生前最想做就係推埋 iOS入電視賣網上內容，點知俾微軟搶先一步，再想一想香港嘅電訊魔童王維基，搞幾年都開唔到電視台，認真冇陰功！

《 HALO》真人版圖片，影片售賣方法未定，可能係包月費、亦可以單集購買，不過最緊張都係香港有冇得睇！（美聯社圖片） 

仲會夾埋 EA Sports搞體育頻道，結合運動遊戲、網上片段、討論區。頭炮係 NFL美式足球，接下來仲會有 NBA！（美聯社圖片） 

聲控手掣、不如四摩打震撼

Pro gamer Elmo 

女玩家 Elmo話最關心個手掣，樣子雖然冇驚喜，但以 360原版改良，手感點都唔會太差，聽講支 pad共有 4個摩打，兩粒「蘑菇」都識震，玩槍 game可模擬射擊嘅反作用力，睇怕佢到時玩狙擊要重新學點瞄準！

唔怕冇二手、最怕玩下載

Gamer manager阿駒 

新機加大控制二手轉讓遊戲碟，開新 game時要入 code、仲鎖死在單一主機，借畀朋友前要先在原機 log-in登記朋友資料。電氣良品店長阿駒認為現時好多大作已經係咁樣 run，買二手遊戲冇 code都上唔到網，用家會慢慢習慣。佢反而慶幸新機仲未完全飛起實體光碟、純玩 download，否則遊戲店一定全線玩完。

撰文：鍾世傑
部分圖片：美聯社