Webber

爆頭女王  Kali Chang宅味拍片

Kali睇落斯斯文文、正職教琴,有邊個估到佢就係 game界
出名槍槍射爆頭、人稱「爆頭女王」嘅 FPS射擊遊戲高手?
更估佢唔到係,年頭 Kali忽然放下狙擊槍,變身 webber,同一班朋友一齊執起 DV開鏡拍短片,以大量爛 gag同本港宅文化元素包裝每週新 game,更引來本地廠商贊助拍片,只要敢去做,無論大步定細步,點都會搵到你嘅空間!

Webber's profile

原名: Kali Chang
職業:鋼琴老師
拍片資歷: 1年
作品總數:約 20多個
總 hit rate: 90多萬次
Subscribers: 1,755

其實你明明有份正職教琴,點解無啦啦走去拍片?

大約 09年 XBox有個《 Gears of War 2》比賽,我貪玩走去參加,點知拎咗第二,後來佢哋隻《 HALO: ODST》出,又係 FPS,可能貪我又係機迷又係女仔容易突出,結果叫咗我幫手,以 pro gamer兼機迷身份等啲傳媒多啲嘢寫,嗰陣《蘋果日報》、《壹週刊》都有訪問我,之後就開始愈來愈多人識, 2011年中開始响《 PCM》寫專欄,上年就到遊戲網站 GameoverHK搵我做 Video Blogger嘞!諗番都有少少機緣巧合!

新片《喪迷》究竟講乜?

 


餵食牛肉乾? 

熱血喪男+Bio? 

跳起加 Yeah?

你認為自己嘅片有咩特別?

我淨係拍 game片,多數都係我出埋鏡、有劇情嘅短片,扮鬼扮馬、玩吓嘢咁,因為我好鍾意外國一個 YouTuber Freddie WONG,我完全係跟佢嘅做法,以 cosplay玩法,將遊戲人物變成真人,好睇又好笑,只要你係打開機,就會見到入面有好多嘢令你好有共鳴,我都係玩宅文化,不過佢係大製作,我係低成本囉!


逢親有遊戲 event都會見到 Kali以嘉賓形式出席,總係有隊 crew跟手拍埋片,唔覺唔覺有時都當咗佢係記者。 

拍短片外有時客串埋做主持訪問網絡紅人,呢條訪問「達哥」嘅片求求其其都過 3萬人睇。 

有幾低成本先?使唔使貼錢拍片?

梗係要啦,本身我都唔係諗住拍片搵食,好多嘢都係碌咭搞掂,演員多數都係朋友客串,場地亦係攝影師問朋友借,其餘道具、劇本、衫褲、化妝等等都係我夾埋啲朋友搞掂,你話使唔使貼錢?不過有時都有啲片係收錢拍,好似其中有一條《古惑仔 3G》就係有 budget,自然製作上都可以做勁啲啦!


Kali最新條片叫《喪迷》,算係佢近期大製作,幕後工夫包括化妝、造型全部自己做晒,真正蝕住做都制。 

條片嘅 making of獨家畀咗《 FACE》讀者睇,想知呢啲片點拍、要準備啲乜?不妨參考! 

𠵱家香港咁多 webber,有冇諗過將來點發展或突圍?

𠵱家拍片都係為興趣,如果要我全職做,我冇乜信心,因為都好難生存,除非好多贊助,所以暫時都仍然要教住琴先。𠵱家拍片門檻好低,人人都拍得,會愈來愈 hit,要突圍而出,主要係睇成本啦,低成本要突圍真係唔易,如果有 idea加埋唔低嘅製作費,我相信總會有突圍嘅一日,其實暫時都係得我一個用咁嘅形式拍片,所以我覺得自己已經有一個地盤,除非時間唔許可,否則我仍然會繼續拍落去。

〈 Webber〉

每星期專訪一位網絡紅人,每星期展示一種網絡力量。


撰文:熊俊彥
攝影:黃家活

arrow
arrow
    全站熱搜

    tvb4life 發表在 痞客邦 留言(0) 人氣()